AA nih Chin mino 4 an tlaih than hna

0

TCP Hakha — Arakan Ralkap (AA) nih Chin ramkulh thlanglei Paletwa khua sami mino pali (4) an tlaih hna tiah kan theih.

Paletwa peng ah Khumi hna caah cawlcang mi phu, Khumi Affairs Coordination Council (KACC) nih “Arakan Army (AA) nih Ngathareng khua ah Chin mino pali (4) an tlaih hna” tiah July 30 ah cathanh an chuah.

“Rakhine ramkulh Kyauktaw in Paletwa lei ah a kal timi minung pasarih (7) lak ah mino pali (4) cu an tlaih hna. An tlaihnak i kalpinak hna a ruang cu hngalh a si lo” tiah KACC nih a thanh.

Chin ramkulh Paletwa peng ah a cangmi kahdohnak le mizapi harsatnak kong ah felfai tein ngiathlaitu phu simi CHRO in Salai Terah nih, “Atu ah pali an tlaih than hna tiah kan theih. Kanmah CHRO zong nih, atu an tlaihmi hna kong ah kan hlathlai cuahmah lio a si” tiah The Chinland Post ah a chimchap a chim.

“AA nih hin, Khumi Mino Bu (KYA) ah a cawlcang deuhmi poahpoah hi cu a kan ral ko, a kan tlerh lengmang. Tli dih hna sehlaw, bochan tlak mino um lo in kan duhning poah in cawlcangh khawh an duhmi a si” tiah Hakha ah a dormi KYA upa pakhat nih a chim.

AA nih an tlaihmi lak ah pakhat hi Ai Aung Soe a si i, Paletwa i Zatlang bu (CSO) ah a cawlcang in rian a tuan cuahmah mi a si tiah theih a si.

Salai Terah nih cun, “Paletwa ah nihin tiang a tlaumi le an umnak theihlomi minung 12 an um rih” tiah the Chinland Post ah a chimchap.

Ngathreng khua cu Rakhine ramkulh, Kyauktaw peng ah a ummi a si i, June thla chung ah U La Kyaw an tlaih i, thla khat hnu July 17 ah a ruak an hmuhnak khua a si tiah KACC cathanh in an langhter.

About The Author

Na ruahning rak langhter ve.. (Leave a comment)

%d bloggers like this: