August Thlachung Hpapun Pengkomh Ah Kahdohnak Voi 100 Leng A Chuak, SAC Ralkap 35 An Thi
The Chinland Post | 2024 September 6 — KNU hmunhma, Hpapun pengkomh, August thlachung kahdohnak ah SAC lei 35 an thi tiah KNU nih September 6 ah thawng a thanh.
Hpaphun pengkomh chung thla fatin kahdohnak dirhmun pawl an thanh tawn hi a si i August 1 in August 31 tiang KNLA, KNDO, dothlennak phu pawl le SAC ralkap karlak ah kahdohnak a chuak lengmang.
August thlachung ah KNLA phufonh le SAC ralkap karlah ah kahdohnak voi 115 a chuak i SAC ralkap 35 an thi, 13 an i hliam tiah an langhter.
Kahdohnak pawl chung ah SAC ralkap nih vanlawng pawl hmang in kahdohnak a tuah ko nain dothlennak phu lei a thi mi an um lo tiah KNU nih a thanh.
Hpapun pengkomh chung ah a um mi SAC ralkap pawl sin ah vawlei lei in bawmhnak a pek khawh ti lo caah van lei in thazang le hriam a chap tiah an thanh fawn.
Cun SAC ralkap nih mipi umnak lei hoih in hriamngan a kah caah August thlachung ah mipi 1 aa hliam, innzuat saṭil cheukhat zong an i hliam tiah a langhter.
About The Author
