Avoi 2nak Chin Ramkulh Cozah Thawngfianhnak Tuah Mi Ah Minister Pu Sui Thio Chimmi
Salai Cung Cung |2018 August 16| Avoi 2nak Chin ramkulh cozah thawngfianhnak tuah mi cu 2018 August 16 zing sml 8.30 in chun 12:00 tiang an tuah i lam le sul minister Pu Sui Thio nih biatlang (7) a chim.
Cu a chim mi hna cu;
1. Kokek ruangah a rawk mi Kalay, Falam, Hakha motor lam meng 124 cu World Bank nih chekfelnak an tuah dih hnu US Dollar 66.8 cawi ding hnatlaknak ngeih mi cu World Bank Country Director nih kaa dang Rakhine ram tibantuk ah bawmh deuh ding si tiah bia a chah mi cu lungtlinlonak a ngei mi Chin ramkulh chung in minung 14724 nih duhlonak an langter hnu ah cu tangka cu an hal mi lam remhnak caah bia an chah than. A bik in chim ka duh mi cu mipi he hmunkhat te ah riantuan hi a si, mipi thazang nih teinak nganpi a chuak khawh tiah chim ka duh.
2. Hakha khuapi telh in Chin ramkulh khua dihlak chung kan hmuh bal lomi Nylon Kat-ta-ya lam Hakha ah meng 3 tluk cu 2 Billion dih in kan phah khawh i mipi tampi zong zalong tein chawhvah, tlunkal khawh a si hi lunglawmh awk ngai si.
3. Kanmah cozah kan kai hnu ah Ramkulh cozah le Ramkulh hluttaw i komh in Paletwa, Matupi, Rezua, Hakha, Falam, Tedim, Tonzang in Cikha tiang meng 505 saumi lam cu thla 12 chun (fur le thaal zong ah) um kal khawh asi i meng 60 Bawili le Sami kar tiva hlei kan tuah lio pi si caah tlawnpal harnak a um. Matupi, Paletwa lam cu Meng 135 in a si chakhlei Laitlang bantuk lam asilo nain 2020 kum ahcun tlun kal khawh a si ve cang lai tiah chim ka duh.
4. Chin ramkulh chungah vanlawng tual sak ding tiah mipi lei halmi cu tu Cozah chan ah lim ding kan tuah cuahmah liopi a si. Ramkomh Cozah nih 25 Billion pek mi in kan tuah liopi a si i 50% cu kan lim cang. Vanlawng tual a sau le a tlik nak cu pee 6000 a si i khualtlawng minung 72 phor kho mi ATR.72 Vanlawng phun a tum kho mi hmun in kan tuah lai.
5. Paletwa Kaladan tiva hlei a sau pee 1943, a kau pee 24 zong cu 2017-18 kum in kan tuah i tu hi 40% an dih cang. Hi hlei tuahnak ding ah tangka cu Billion 20 a dih ding asi i 2020 ah hunnak tuah khawh ding ah timhtuahnak kan ngei. Cun Chin ramkulh Paletwa in India ram Zorinpui tiang meng 60 a kau pee 24 in Nylon Kat-ta-ya phah dingah India cozah he hnatlaknak kan ngei i tu hi rian an thawk cang. Hi lam cu 2020 kum dih hlan ah dih ding in timh tuahnak kan ngei. Hi lam kong ah tangka dih ding hi India cozah lei nih tuanvo an lak dih lai tiah chim ka duh.
6. (a) Kanpetlet Sami lam meng 146 cu 2017-2018 kum in rak thawh mi a si. (b) Hakha Taung khinyan lam meng 68 cu 2017-2018 in kan rak thawk i meng 30 fai a dih cang. Sagaing ramthen a chuakmi facang, chiti le pe ti bantuk phun tampi cu Hakha, Thlangtlang, Falam mipi thathnemtu a si caah hlawknak tampi a kan pek lai tiah ka ruah. Cucaah hi lam hi 2020 kum dih lei ah dih dingin timhtuahnak kan ngei.
7. Pehtlainak kongkau he chim ka duh mi cu e-Government caah pehtlainak line cu special deuh in kan tuah i 2017 December 24 in kan thawh i Hakha peng ah 4G ngah ding in kan rak tuah.+++
About The Author
