Avoi 2nk CYO Cup Ah Khua Thar Nih Pakhatnak An Lak
The Chinland Post| 2018 April 12| Chin Youth Organization nih 2018 April 2-12, tiang ni 10 chung an tuahmi pumpululh chuih zuamnak ah Hakha Khuathar (A) le Zokhua Area Youth Fellowship (ZAYF) final an kai i Khua Thar (A) nih 3-2 in an tei hna caah Khua Thar cu pakhatnak an si.
Champion Khua Thar (A), Pahnihnak ZAYF le pathumnak Hakha Thar an si. Kawlbawh thiambik-Khua Thar (A) Ta Ta Lay, Kawl tambik suttu-Khuathar (A) in Van Bawi (Goal 10), Hnukham thiambik-ZAYF in Elishma, Wing thiambik –Khua Thar (A) in Thiha, Hmaikal thiambik-Hakha Thar in Cung Chin, a chuih mi vialte lak ah a thiambik-ZAYF in Chit Ko Ko le hruaitu (Coach) thiambik ZAYF in Salai Ngun San Aung nih an hmuh.
“CYO Cup kan tuah hnawhchan cu a pumpululh chuih le laksawng nakin khan mino hna i hngalh, i hawikomhnak ngeih in hmailei ah lungrualnak he karhlan ti khawhnak ding caah pumpululh chuih nih hin khat le khat a hngalh ter in a pehtlaih ter hna lai timi ruahchannak le tinhmi kan ngei. Cozah zong nih CYO cawlcanghnak an kan hngalhpi caah tangka thazaang in minister Isaac Khen zong nih a kan bawmh, cun bualrawn i Chin National Day tuahnak donhlei le inn pawl an theh lomi zong kan chimh hna tikah nikhat hnih chung ah an kan lim piak i kan tha nuam lawng siloin kan i lawm tak tak. Kanmah nih hal hau loin miphun le ram dawtnak he CYO cawlcanghnak ah thazaang, ngeihchiah le thinlung ruahnak a chuahtu nu le pa, hawikom vialte cungah kan i lawm tuk hring hran, upatnak zong kan pek hna” tiah CYP President Salai Jacob Thang nih a chim.
Tutan hi CYO nih minung 11 chuih in Cup an tuah a kum hnihnak a si. Kum khatnak lio ah Mie peng le Khuathar Final an kai i Mie peng nih an rak tei hna.
Tukum hi phu 12 an um i group pali ah then in an chuih ter hna, Pyidawtha, Hakha Thar, Khua Thar le ZAYF hi Semi a kai mi an si i ZAYF nih Hakha Thar cu 2-1 in le Khuathar nih Pyidawtha cu 4-3 in an tei hna caah Khua Thar le ZAYF Final an kai. Pyidawtha cu Hakha Thar nih 1-0 in an tei hna caah pathumnak cu Hakha thar nih an lak.
Tukum CYO Cup tuahnak caah Chin ramkulh Sipin Minister Salai Isaac Khen nih sing 20, Gracy Company Managing Director a si mi Dr. Ram Ceu Hnin nih sing 5 le Mai Biak Mawi Sung nih 20,000 tiin an hlut. Pakhatnak laksawng hi tangka sing 5, Trophy le thi, pahnihnak laksawng cu tangka sing 2 le thi, pathumnak laksawng cu tangka sing khat hna an si. April 14 hi CYO hruaitu thimnak le General Meeting zong a si beh lai tiah kan theih.+++
About The Author
