Bawlakhe sakhaan lak kahdohnak ah SAC ralkap 10 an thi, 120MM telh in hriam tampi an lak khawh
The Chinland Post | 2023 March 3 — Kayah ram, Bawlakhe peng, chung ah a um mi SAC ralkap hriamngan chiahnak sakhaan pakhat cu KA, KNDF phufonh nih an kah hna i sakhaan an lak khawh leng ah SAC ralkap 10 an thi, 120 MM hriamngan telh in hriam zuun 11 le kuanzen pawl an lak khawh tiah Karenni kahdohnak lei thawngthanhnak nih cathanh a chuah.
February 27 zinglei sml 6:30am hrawng ah Bawlakhe peng ah a um mi SAC Infantry 135, Infantry 54, le No. 360 sakhaan hna cu KA Battalion 1, Battalion 5 le KNDF phufonh nih an kah hna i hriamngan pawl an chiahnak sakhaan cu caan rau lo te ah an lak khawh tiah theih a si.
A pakhatnak sakhaan an lak hnu sml 8:00am hrawng ah a pahnihnak sakhaan lak ding in an i zuam lio ah SAC nih Jet Fighter 5 in bom a rak thlak hna, Machine Gun in a kah hna caah a kir ṭhan tiah theih a si.
Cubantuk in SAC nih Jet Fighter in bom a thlak ruang le Machine Gun in a kah hna ruang ah KA, KNDF phufonh lei in a nunnak a liam mi an um i 15 hrawng an i hliam tiah an langhter.
120MM hriamngan 2 a um ko nain 1 lawng an lak khawh i 1 cu sakhaan leng ah an chiah tak tiah an thanh.
About The Author
