Chaklei Shan ram kahdohnak ah SAC ralkap 25 an thi, hriam tampi zong an lak khawh
The Chinland Post | 2023 February 13 — Chaklei Shan ram, Nawnghkio peng ah MDY PDF le SAC ralkap hna karlak ah kahdohnak a chuak i SAC ralkap 25 an thi, MDY PDF hriamtlai 2 zong an nunnak a liam tiah MDY PDF nih cathanh a chuah.
PDF Mandalay battalion pawl an umnak Pyin Oo Lwin le Nawnghkio karlah ah SAC ralkap thazang tampi le hriam tampi in an luh caah MDY PDF nih an doh hna i SAC ralkap hriam tampi an lak khawh, kahdohnak chung ah PDF hriamtlai 2 an nunnak a liam i SAC lei 25 an thi, hliam a tuar mi zong an tam tiah an thanh.
February 10 ah thazang tampi in a rak lut mi SAC ralkap pawl cu kahdohnak chung ah an sungh tuk caah vanlei kahdohnak voi 3 an tuah hnu ah an kir ṭhan tiah theih a si.
Sml 6 leng a rau mi kahdohnak chung ah PDF hriamtlai Sit Naing Ih le Phoe Wai an nunnak a liam tiah theih a si.
About The Author
