Chin le Rakhine ralzaam hna bawmhnak pek dingah harnak le riikhiah piaknak a um tiah UN OCHA nih a chim
The Chinland Post | 2022 September 2 – Kahdohnak pehtlai in a chuahnak Chin le Rakhine ram hna i innlo a zaamtakmi hna ṭha tein bawmhnak pek khawhnak hnga harnak a um bantuk in hmunhma tampi ah himnak (security) rengh a si tiah UN OCHA nih September 1 ah a thanh.
Chin le Rakhine ah ti lam, mawṭaw lam telh in sii-ai bawmhnak, eidin le adang dang bawmhnak hna phorhnak nawl rii an khiah tiah cathanh ah a langhter.
Cathanh chungah himnak an rengh tiah a ṭial ko nain SAC maw asiloah tlangcung hriamtlai maw timi cu fiang in a langhter lo.
2019-2020 kumkhat chung lawngah a rak chuakmi kahdohnak ruang ah Rakhine le Chin ramkulh Paletwa peng telh in peng 10 ah a ummi mipi 75,000 deng nih innlo zaamtak in hmundang ah an i dor caah atutiang bawmhnak pawl an i bochan rih ko.
Atulio Rakine ram chungah AA le SAC ralkap karlak ah kahdohnak a fak khun i Maungdaw, Yatetaung le Mrauk-U peng hna ah kahdohnak a chuak lengmang tiah a langhter.
2021 February 1 ah SAC nih hramhram in uknak a lak hnu thok in 2022 August 22 tiang Myanmar ram pumpi ah innlo a zaamtakmi 949,000 telh in minung 1.3 million deng nih innlo an zaamtak cang tiah UN OCHA Myanmar nih cathanh ah a langhter.
About The Author
