Chin Ramkulh Cozah Tuahmi Kum 72nk Chin Miphun Ni Thantlang CNF Kai An Tim Lo

0

Chin National Front/Army at the 66th Chin National Day Mindat/Daniel Sakhong

Salai Josephbawi| TCP 2020 January 30| Chin ramkulh cozah tawlrelnak in kum 72nk Chin Miphun Ni (Chin National Day CND) cu Chin National Front (CNF) lei sawm an si ko nain CNF lei nih nan kan sawm ahcun CND puai biachimnak nawl kan pe ve u tiah an halmi hna cu pek an timh hna lo caah CNF lei kai ding an itim lo tiah theih a si.

Tutan a kum 72nk Chin National Day ahhin CNF upa kan sawm dih hna. Pu Hnin hi Thantlang peng aiawh in cunglei a thu ve ding chairperson (သဘာပတိ) ah kan thim ve. CNF lei zong nih hmurka in biachimnak an kan hal. Peng committee nih Ramkulh Cozah kan chimh hna i Ramkulh he a voilinak TBC meeting zongah kan chim. Kan pe lai pe lai lo timi (Yes or No) zong bia an kan leh lo. Avoinganak January 21 zongah Ramkulh Cozah he meeting kan thu lai I kan hal than hna. Ramkomh Cozah lei nih an duh lo an ti. Cucaah Thantlang khuanu khuapa zong Chin Miphun Ni kong he pehtlai in Yangon ah bawmhhalnak an kal i NRPC (National Reconciliation for Peace Centre) upa zong tonpah an timh hna. An ton khawh hna ahcun bia afiang ko lai tiah Thantlang khua tuah dingmi 72nd CND Peng Committee  Chairman Pu Ram Khar nih The Chinland Post ah a chim.

Biachimnak an kan pek lo ahcun kan kaiman sullam a um lo. An kan sawm zongah biachimnak an kan pek tunglo ahcun kai lo ding tiin policy kan thlak cang. CNF lei in nihin nitiang Federal kong, CND chuahning kong, zeitin dah hmailei Chin miphun kar kan hlan lai timi lawng kan chim tawn I Ramkomh COzah le Chin ramkulh COzah kan hnorsuannnak pakhat hmanh kan chim lo. A chunglei cu kan thei dih lo nain zei ruangah NLD Cozah chan in biachimnak an kan pek tilo timi ruah awk ngai a si. USDP Cozah chan Mindat asi ah Hakha a si ah CND tuah zong hmunkhatte ah kan tuah ti, bia zong kan chim, tangka a dihmi zong zatawk cio kan rak tuk ve tawn.  Nikum Falam an kan sawmmi zong kan Chairman pi zong an sawm na in hmunhma tha zong an pe lo  tiah Thantlang CNF Liaison zung lutlai Pu HC Ral Hnin nih The Chinland Post ah a chim.

Hi Ramkulh Committee ah CNF zong an itel ve ko tinak ah amin in Dr. Lian Hmung Sakhong zong Patron (နာယက) ah an tel, kei zong Peng committee ah an ka tel ve. A min men in telhmi kha kan duhmi a si lo. A ngai te ti ahcun Chin ramkulh Cozah nih Chin Ramkulh Ni ti lawngin an rak tuah tawn i CNF kan hal hnu lawngah official tein Chin Miphun Ni (Chin National Day) tiin kan tuah khawhmi hi a si. A zungzal in CNF biachimnak an kan pek peng lai kan ti duhnak a si lo. Atu kan zoh a si ahcun Remdaih serlio caan a si. Cucaah tha tein zei paoh hi Cozah he naihniam tein rian kan tuanti a si ahcun remdaihnak zong a tha deuh lai a tluang deuh lai ti kan ruah caah a si. Atu ah hi bantuk zei rello phun in a lenglei chuahter in Biachimnak pek duhlo an kan ummi hi Remdaihnak ca ah a tha lo tiah a biapeh ah chim.

Hi kong he pehtlai in Chin Ramkulh cozah chimrelnak nawlngei Sipin Minister U Soe Htet nih Rampumpi huap kahngolnak (NCA) min a thumi tampi an um ve. Chin ramkulh ahcun CNF phu khat lawng a um. Adang ramkulh hna ahcun phukhat leng a ummi zong an um. A tu bantuk Chin National Day timi ramkomh level in theihpimi le tuahmi a si caah CNF bia kan chimter hna a si ahcun adang hriamtlai pawl nih an icawn lai i hmailei a buaituk suallai ti phan a si caah cunglei in pek lo ding an ti tiah ka theihmi  a si tiah The Chinland Post ah a chim.

Kan mah USDP lio zongah Lian Hmung Sakhong, Pu Zing Cung tehna biachimnak pek tawn mi an si ko caah biachimnak va pek zong cu siarem lo le duh lo awk a um hme maw. An duh le an chim ding tu kha ca in kan pe ta hna seh law tiin hei ti hna seh law siam rem lo awk a um lo ka ti. Cunglei tiang nawl an hal hna tikah a hlan bantuk khan an hei ruat kho lo deuh le si lai cu. Chim ter hna awk an si ko. tiah MP Van Thawng nih The Chinland Post ah a chim.

Hi bantuk CND puai cu Ramkomh dirhmun in theihpimi le tawlrelmi a si caah a dang Ramkulh zongah hriamtlai phu pawl an pe cio hna lo.  Cucaah kanmah ramkulh lei nih chimtermi silo in cunglei nih an rak timi a si caah a si. CNF thutnak hmunhma tha tein an pe lo timi zong puai a tawlreltu hna hmunhma pekningin a kalmi a si ko tiah Chin ramkulh hluttaw Speaker Pu Zo Bawi nih The Chinland Post ah a chim.

Chin National Day cu Chin Miphun karlak ah tlukrualnak le zaukphung leng cang seh tiin U Vomtumaung hruainak in February 20, 1948 Falam khua tuahmi in aa thok i 2020 kum ah a kum 72nk a tling cang. Ralkap uknak tangah Chin National Day tiin tuah khawh a rak si lo i Chin State Day tiin rak tuah pengmi a si. Chin National Day hi 2012 May (7) avoikhatnak Chin National Front le Ramkomh Cozah karlak kahngol remdaihnak minthut hnatlaknak No.11 ningin February 20 cu Chin National Day tiah tuah ding le Chin Ramkulh Ni (Chin State Day) cu January 3 ah tuah dingin ti le CNF le Ramkomh Cozah 2012 December 7 in 9 kar a voihnihnak kahngol hnatlaknak No.2 zongah February 20 cu Chin National Day tiah tuah ding le CND Ni cu Ramkulh Zung kharni ah hman kho dingin Ramkulh Cozah nih tawlrel seh tiah hnatlaknak an ngeihmi a si.

Chin National Front le Ramkomh Cozah hnatlak hnu 2014 kum (66)nk Chin National Day Mindat cu hlunghlai ngai in an rak tuah ti. Cu hnu in CNF le Cozah nih an rak tuahti lengmang i biachimnak zong rak pek peng a si. 2015 NLD a kai hnu in CNF cu CND ah biachimnak pek a si tilo. Kum 71nk Falam tuahmi Chin National Day zongah CNF sawm an si nain a tlangthumnak hrawng lawngah thutnak an pek hna caah mipi soiselnak an rak tong ngai tiah theih a si. +++

About The Author

Na ruahning rak langhter ve.. (Leave a comment)

%d bloggers like this: