Chin ramkulh, ni 10 chung kahdohnak ah SAC ralkap 45 an thi, hriam 50 leng an lak khawh, CNA ralkap 3 an nunnak a liam
The Chinland Post | 2023 February 13 — Chin ramkulh Matupi peng, le Thantlang peng ah February 1 in February 11 tiang CNA, CDF phufonh le SAC ralkap karlah ah kahdohnak a fak i SAC lei in 45 nak tlawm lo an thi, 22 leng an i hliam i meithal zuun 50 leng an lak khawh tiah Chin National Front (CNF) nih a thanh.
February 4 ah CNA nih a tlaihnak Brigade 1 hmunhma a si mi Matupi le Rezua khua karlak, Zotung hmunhma ah SAC ralkap thazang 150 deng hrawng an rak luh caah, CNA, CDF-Zotung, CDF-Matupi, CDF-Mara phufonh hna nih ni 6 chung fak pi in an doh hna i SAC ralkap 40 leng an thi, 20 leng an i hliam tiah theih a si.
February 1 ah CNA nih a tlaihnak Brigade 3 hmunhma a si mi Thantlang khua ah SAC ralkap le palek 6 cu hriam he an tlaih khawh hna bantuk in February 8 zong ah SAC palek sakhaan le GAD zung hna zong an lak khawh tiah CNF nih a langhter.
February 4 ah CNA nih a tlaihnak Brigade 4 hmunhma ah CNA le CDF-Hualngoram nih eidin an phorh lio ah SAC leiṭang ZRA nih a thli tein an rak kah hna caah kahdohnak a chuak i ZRA lei 1 a thi, 2 an i hliam tiah theih a si.
Kahdohnak pawl chung ah SAC lei 45 nak tlawm lo an thi i 22 hrawng hliam an tuar, meithal zuun 50 leng an lak khawh tiah theih a si.
Kahdohnak chung ah CNA ralkap 3 nih ram le miphun caah an nunnak an pek 2 an i hliam. February 1-11 tiang SAC nih vanlawng le Helicopter in a tlawmbik voi 10 bawm a thlak i Hakha hramhram SAC LIB 266 in Thantlang lei ah hriamngan zong kah a bawmh peng tiah CNF cathanh nih a langhter.
About The Author
