July 25, 2024

Chin ramkulh peng cheukhat ah SAC nih thimnak caah chungkhar cazin a lak thluahmah

0

The Chinland Post | 2023 January 18 – A raa lai mi August thla chung ah tuah ding in SAC nih timhtuahnak a ngeih mi thimnak caah Chin ramkulh chung peng cheukhat ah chungkhar cazin le minung cazin innkhat hnu innkhat lutchuak in an lak tiah theih a si.

Chin ramkulh khualipi Hakha cu January 13 in palek, ralkap le Non-CDM pawl nih chungkhar cazin hna an lak tiah Hakha khuami pakhat nih a chim.

“Khuathar ahcun nihnih thum hrawng an lak cang, Non-CDM pawl, palek, ralkap zong an i tel. Non-CDM pawl nih an lak i an pawngkam ah palek le ralkap nih an cawngh hna. Me kan thlak lo hmanh ah min cazin an lak ning in me an rel lai tiah ka ruah. Tlukruannak a um lai lo ti cu a fiang ko” tiah Khonumthung Burmese ah a chim.

Hakha khua minung cazin laknak cu January 17-18 ahcun Hermon le Bethany sang hrawng ah an lak cuahmah lio a si tiah Hakha khuami nih The Chinland Post ah an chim.

“January 17 zinglei ah khan kan inn an rak phan, kan chungkhar cazin chung in hodah a um ti lo, hodah a taang timi pawl hna kha an kan hal” tiah an chim.

Falam khua zong ah SAC ralkap pawl le GAD zung rianṭuantu pawl nih innkhat hnu inn khat in an lak thluahmah i thimnak he pehtlai in a hmuh ning zong kha atu bantuk in a chim.

“Inn tiang anmah pumpak in cazin an rak lak, nan duh ahcun thlak lo zong a ngah ko ti phun khin an rak zoh, cazin an lak ruang ah kan thlak hrimhrim lai tinak a si lo, kanmah duhthimnak a si, nan thlak hrimhrim lai ti a um lo” tiah a chim.

Cubantuk in Matupi khua zong ah SAC ralkap nih chungkhar cazin an lak leng ah minung cazin zong an rak lak tiah theih a si.

Chin mipi hriamtlai phu hna nih cun SAC nih  tuah a timh mi thimnak kha an doh i SAC he rian a ṭuanṭi mi poah fak pi in dantat nan si lai tiah a thanh.

January 13 ah Hakha khuachung i minung cazin a la mi palek phu pawl cu mipi hriamtlai nih an kah hna i palek 1 a thi, 4 an i hliam caah Hakha khuachung ah himnak an rengh tiah theih a si.

“Lam cung hmunkip ah an ke in pathumli hrawng fonh in an i chawk lengmang,” tiah Hakha khuami pakhat nih The Chinland Post ah a chim.

SAC nih thimnak caah minung cazin laknak cu January 9-31 tiang pehzulh a si lai tiah a rak thanh.

Hmanthlak – Lamzawh lio i SAC ralkap pawl Hakha khuachung an rak i chawh lio

About The Author

Na ruahning rak langhter ve.. (Leave a comment)