CHRO Le PACE Thithruainak In Titoih Puai Ah Cozah Riantuantu Hramhram In Laam Terlo Ding In Ca An Pek
The Chinland Post| 2018 April 3| Chin miphun nuhrin covo humhim le kilvennak ah riantuanmi Chin Human Rights Organization (CHRO) le thimnak ngiathlaitu phu simi People’s Alliance for Credible Elections (PACE) thithruainak in cozah nih riantuantu hna Kawl titioh puai ah hramhram in laamter lo ding ah ca an pek tiah kan theih.
Chin ramkulh cozah sin ca an pekmi ah, an duhmi thil pali an langhter tiah theih a si.
“Chin ramkulh cozah nih miphun le biaknak in thleidannak um lo tein riantuanmi cozah phu a sinak theihpi bu in, Chin ramkulh khualipi ah tuah dingmi Kawl titoih puai ah cozah riantuanmi cheukhat nih anmah lungtlinnak tello in, laamter an sinak an langhtermi cung ah ca kan peknak a si” tiah tuanvo ngeitu nih the Chinland Post ah an chim.
Atu bantukin, CHRO le PACE thithruainak in an tuahmi duhnak an langhtermi ah pumpak in siseh, a phu in siseh, minung 30 tluk nih min an thut hnu ah cozah sin ah an pek hi a si.
Chin ramkulh cozah sin i an pekmi ah, Kawlram cozah le ILO nih hnatlaknak ngeihmi ahohmanh hramhram in an duhlomi tuahter lo ding timi cherhchan in, tutan Chin ramkulh khualipi Hakha ah tuah dingmi Kawl titoih puai ah hramhram in cozah riantuantu rian nan fial hnanak lo ding mizapi aiawh in theihternak kan rak in tuah hna. Cun, cozah riantuantu hramhram in nan laamter hna lo nak ding zong a thar in nawl kan in duh hna i, nan ruah than ding zong kan in nawl fawn hna tiah cozah sin ca an pekmi ah an langhter.
Hi kong he pehtlai in, Cozah sin capeknak ah aa telmi pakhat nih, “Hluttaw speaker siseh, Minister a ummi vialte pumpak in kan ton hna i, kan pek dih hna. Kawl titoih puai ah, cozah riantuantu laamter an sinak kong he pehtlai in, an ruahnak kan hal hna tikah, anmah pumpak an sinak in kan duhmi a si lo an ti dih. Minister pakhat le bang nih cun, ‘Kei kaa tel lo, khah!’ tiah a kan ti. Khuaruahhar a simi cu zei ko dah an tihmi a um hnga tiah The Chinland Post ah a chim.
Chin ramkulh cozah nih kum fatin ramkulh khualipi Hakha ah Kawl titioh puai hi cozah hruainak in an tuah i hramhram in cozah riantuantu an laamter theo hna. Hramhram laamternak kong he pehlai in, Cozah tonnak ah aa telmi pakhat nih, “cozah kan ton hna lio ah an kan lehmi cu hramhram in kan laamter hna lo. Amah duhte in an laammi a si. Hramhram in fial zong an silo tiah a kan ti. Asinain, cozah zungpi ah zung riantuan lo in an laamtermi hna kan va ton tik hna ah, hramhram in nan laam lai ti cu an kan ti taktak lo. Nain, nan laam a hau. Kanmah nih kan tuahmi a si i, nan laam lo ahcun, a poi lai tiah kan Bawile nih an kan ti ahcun, zeitindah an bia kan al ngam rua hnga ti a kan leh” tiah the Chinland Post ah a chim.
The Chinland Post nih, Kawl titoih puai ah laam ding in laam a cawng liomi pakaht kan pehtlaih tikah, nan laam hrimhrim lai, nan laam lo cun nan rian kan in phuah hna lai timi cu an chim taktak lo. Nain, kan Bawile nih laam a herh an kan timi an bia kan al hna ahcun, hmailei kan caah thanchonak a um lai lo. Kan lam a pit lai timi kan phan caah a si ko. Laam cu kan duh naisai lo, a huam zong kan huam lo. Duh cukmak in a laammi ka si lo. Kan hmailei caah kan ruah ruang ah kan i hnekmi a si ko tiah” a chim.+++
About The Author
