Dr. Za Hlei Thang Ruak Cu Kawlram Ah Tlunpi In Falam Ah Phum Ding Timlam
TCP-Online| 2018 March 19| March 17 ni zanlei suimilaam 1:34 ah mual a liam mi Chin MP hlun le CNF ah former Chairman a tuanmi Dr. Za Hlei Thang cu US ram i Georgetown University Hospital ah cuap lei damlonak in mual a liam ruangmang.
Amah a nun lio hrim ah hin ‘ka thih tikah ka rual cu Falam thlanmual ah ka vui te uh’ tiah bia a rak cah hna. Cucaah, Dr. Za Hlei Thang ruak cu Kawlram ah tlunpi in Falam khua ah vui dingah timhlamhnak an ngei ti kan theih.
Hi kongah Maryland i FBC khrihfabu ah Pastor tuan liomi Rev. Dr. San No Thuan nih “A fanu Dr. Milan Za hi April 13 ah caminpuai ngei ding a si caah a ruak cu Frederick, Maryland ah sau nawn chiah rih kan tim. Biafang deuh kan theih in thawng zong ka rak thanh than te lai” tiah Chinland Today Media ah a chim.
Dr. Za Hlei Thang cu 1943 kum April 6, Falam peng Tlauhmun khua ah a chuak i a thih ah kum 75 a tling. Yangon ah tanghra a dih, tanghra a dih nak hmun ah hin a mah tel in minung 3 lawng nih sii lei kainak Doctor an rak kai kho.
“Dr. Za Hlei Thang hi sianghngakchia a rak si lio te in miphun dirkamhnak ah hmaisuang a rak si zungzal. Ne Win cozah nih saupi thong an rak thlak. A chuah hnu ah sianginn a peh than i Siibawi rian a tuan. 1990 thimnak lio ah Falam peng in MP a tling mi asi. SLORC ralkap cozah nih tlaih an timh caah ramleng ah a rak chuak mi asi. 1994 kum Marnepalaw KNU hmunlipi ah kan rak ihmu hmasa bik. Mah hnu cun 1998 Ottawa Chin seminar ah kan i tong than. 2011 CNF conference ning in 2012 thok in hmasabik Supreme Council Chairman a tuanmi asi. Amah a tuan lio ah CNF le Kawl cozah ahmasa bik chawnhbiaknak an thawk asi. Mi nunnem, miphun daw, pa chuakthiam asi” tiah CHRO in Executive Director Salai Bawi Lian Mang nih a facebook ah a tial.
Dr. Za Hlei Thang a nupi cu Sayamah Ni Dong a si. Fanu Dr. Milan Za le fapa San Oo Za a ngeih hna.+++
About The Author
