Hakha-Paletwa Lampi Furthal Hlan Motor Kal Khawhnak Papek In Ka Tuan Lai; Minister Pu Sui Thio
Salai Ngun San Aung| 2017 April 26| Hakha in Paletwa tiang motor lam khan 509 hi motor lam a pem khan a si cang i fur thal hlan in a kal khawh nakhnga biatak tein ka tuan lai tiah Chin ramkulh Lam le Pehtlaihnak Minister Pu Sui Thio nih The Chinland Post ah a chim.
“2017-2018 rampi tangka kum ah Chin ramkulh Lam le Pehtlaihnak zung nih budget kan hmuhmi hi Ks. Nuai 57,938.933 a si. Tukum ah a bik in kan tuan dingmi Hakha in Paletwa tiang hi fur thal hlan in motor a kal khawhnak hnga kan tuan lai” tiah TCP ah a chim.
Atu ah biapi in tuan an timhmi lam Chin miphun le ramkulh caah a biapit ning le kan miphun a kan thathnemnak ning kongah Minister Sui Thio nih a hmuhning cu hitihin a chim.
“Tuhlan cu kan i hngal lo. Tucu kan i tlawngkai kho cang lai. Paletwa ahcun hai hna hi pumkhat ah tamat lawng a si. Cu bantuk eidin pawl cu Hakha zong nih man fawi tein kan ei khawh lai. Tucu kan i tlawnkai, pehtlaih khawh lai tikah kan i daw deuh cang lai.”
Hi lam pi hi Chin ramkulh changlei le thlanglei kan i pehtlaihnak ah ramkhel, chawlehthalnak le zatlang dirhmun zongin a biapitnak kong Chin National Democratic Party Secretary Salai Ceu Bik Thawng nih hi tin a chim.
“Hihi 2010 thimnak lio ah khan kan party policy zongah kan rak chiah. Cun 2011 ah khan hluttaw ah kan chuahpi nain Hung Ngai cozah nih Rohingya hna fawi tein kan ram ah an lut lai tiin an rak kan awm duh lo. Hi lam hi 2012-2013 in tuan an thokmi a si. Hi lam a hram thok tu kan si ti khawh a si. Chin ramkulh cu Rili a ngei lomi (Land lock) kan si. Cubantuk ram pawl cu vawlei cungah thanchonak leiah a nuarbik an si theo. Chawlehthalnak lei in kan chim ahcun, Paletwa hi Chin miphun nih kan rawl um ah kan ser khawh a herh, Paletwa cu Chin ram chungah cinthlaknak a thatbiknak hmun a si. Cun miphun mit in kan zoh ahcun Chin ramkulh hi Kawlram chungah khuapi pakhat le pakhat pehtlaihnak a chiatbiknak a si. Paletwa lawng lo Mindat le Kanpetlet zong lam tha tein a um lo. Kanpetlet in Paletwa kar zong lam a um a herh” tiah Chinland Post ah a chim.
Cun, “hi khuapi pahnih kar ahhin Dai miphun pawl tampi an umnak hmun a si. Hi hna ca zongah motor lam a pem hrimhrim a herh. Khuapi pakhat le pakhat pehtlaihnak lam an kan tuahpiak duh lo cu, thencheunak tha an pek a si i kan nunphung le caholh thanchonak a nuarh ding an duh caah a si. Cu nih cun miphun lungrualnak a hrawh. Cun Miphun humhimnak (National Security) in kan zoh tik zongah Paletwa cu Mizo, Bangladesh le Rakhine he ramri an si. Arakhan Army le Arakan Liberation Party hriamtlai phu pahnih nih kan miphun hna an kan hnawhnak hmun zong a si caah tubantuk in lam kan herh le a biapitnak cu a si. Kan miphun hi kan zoh tikah kan lolu le kan lotaw in a zut. Kan lotaw asimi Paletwa ah Rakhine nih hna an kan hnawh, Kan lolu Tonzang lei ah Kate hriamtlai le a dang hriamtlaiphu pakhat an um. Tubantuk in kan lolu le lotaw in hriamtlai nih hna an kan hnawhnak cu hi hmun pawl hi kan hlatkai khawh set lo caah a si. Cucaah tu an tuanmi lamthlurpi lawng siloin Chin ramkulh chung khuapi dihlak hi fawi tein fur thalhlan kan i tlawnkai khawhnak motor lam cu kan ngeih hrim hrim a herh” tiah a biapeh a chimchap.
Hakha in Paletwa tiang kalnak lam pi cungah a ummi Bawili hlei pe 480 a saumi zong an lim cang i hunnak zong tuah ding timhtuah a si cang caah tlawnkainak a fawi te cang lai tiah theih a si. Hakha in Matupi hi khan 175 a si i Matupi in Paletwa hi khan 135 a si.
Hakha-Paletwa cu khan 300 lawng a si caah lam a that ahcun nikhat le zankhat ah thadam tein phak khawh a si cang lai.
Hi cabia cu 2017 April 26 ah Chin ramkulh Lam Le Pehtlaihnak Minister Pu Sui Thio nih The Chinland Post ah a rak chimmi bia a si. Atu hi a rak chimnak kumkhat a tling manh cang. Nihin tiang cu an tuan cuahmah ko nain farthal hlan motor kal kho ding in an tuanchuah kho rih lo tiah kan theih.
Mah lio a rak chim link cu; http://www.thechinlandpost.com/chin/chin-politics/1732-hakha-paletwa-lampi-furthal-hlan-motor-kal-khawhnak-ding-papek-in-ka-tuan-lai-minister-sui-thio
About The Author
