Innlay hmunhma PDF 8 an tlaih hna
The Chinland Post | 2023 January 9 – Shan ram thlanglei, Nyaungpin peng, Innlay hmunhma PDF 8 an tlaih hna tiah thawng theih a si.
PDF chungtel hna cu 2022 December 27 le 2023 January 4 ah an tlaih hna. SAC zong nih PDF 8 kan tlaih hna tiah January 7 ah a thanh.
Tlaih a tong mi hna hi U Za Na Wa, Ko Thar Nge, Ko Zaw Zaw Aung, U Aih Run, Daw Tin Tin Nyo, Ko Min Min U, Ko Zaw Myo Aung le Ko Zwe Nyi Htun hna an si tiah SAC nih a langhter.
PDF pakhat an tlaih hmasa hnu ah pehzulh in an tlaih hna tiah theih a si.
January 3 ah Nyaungshwe peng, Lungkan khua pawng ah SAC ralkap le mipi hriamtlai phu hna karlak ah min 40 hrawng kahdohnak a chuak. Kahdohnak chung ah mipi hriamtlai 3 an nunnak a liam i kuttuah meithal, AK-47, M-4 le adang puak kho mi thilri cheukhat an lak piak hna.
SAC nih a thanh ning ahcun hmunhma zohfelnak kan ngeih lio ah kan tlaih hna hi a si tiah a thanh.
