Irrawaddy ramṭhen PDF 19 kan tlaih hna tiah SAC nih a thanh
The Chinland Post | 2022 September 5 – Irrawaddy ramṭhen, Pyapon le Maubin PDF chungtel 19 cu hriam he kan tlaih hna tiah SAC nih September 3 ah a thanh.
Black Dragon Force Pyapon-PDF chungtel le Maubin PDF chungtel hna cu August 29 le August 31 ah Pyapon le Yangon ah SAC ralkap nih an tlaih hna hi a si.
Cu phu hna nih SAC Mytel tung telh in SAC zung pawl kha voi 6 an puah i dalan voi 6 an thah tiah SAC nih a puh hna.
Kan tlaihmi hna hi KNLA battalion 7 chungah a ummi ABSDF le KNLA battalion 7 ah bom lei cawnnak a ngeimi an si tiah SAC thawngzamh ah a langhter.
An tlaihmi hna belte nih SAC nih a puhmi hna cungah zeihmanh al ṭhannak nawl an ngei rih lo.
SAC nih hmanthlak he a thanhmi pawl hi PDF pawl si loin khuachung kahdohnak a tuahtu cheukhat le khua mino hna an si tiah khuachung kahdohnak a tuahtu pakhat nih DVB ah a chim.
SAC nih a thanhmi chungah a thimi pakhat zong aa tel tiah a chim.
Kan tlaihmi pawl hna hi phungning tein a zizut khawhnak hnga kan tawlrel lio a si tiah SAC nih a thanh ko nain an tlaihmi pawl hi khoika dah an hren hna i zei bantuk sualphawtnak in dah a zizutnak an tuah hna lai timi cu theih a si rih lo.
Yangon ramṭhen ah tlaih a tongmi khuachung kahdohnak a tuahtu pawl cu Shwepyitha biahalnak ah biahalnak an tuah hna tiah theih a si.
About The Author
