Ka Alngam Lo Mi Tangka Bia A Al Ngamtu Lai Pasal Tha Le Nusal Tha Kan Lairam Nih A Herh

0

Thomas Liankham| The Chinland Post| 2020 April 8| Nihin Laimi kan dirhmun Kan zoh tikah tangka nih bia achim chan, tangka nih mi thinlung a uk chan le tangka bia kan al ngam lo chan a si tiah ka ruah. Minung kan nunnak le kan pawcawmnak caah tangka hi a biapi bik mi ah ai tel ve mi a si. Tangka aduh lo mi kan um lo i tangka he ahohmanh kan in then kho lo.

Tangka thih cu kan tih. Tangka deu ser zong kan tih. Cu nak in tih a nung deuh mi cu tangka nih minung tuh ser hi a si. Tangka cu minung nih sermi a si i minung nih kan hmang ding mi a si. Asinain nihin Laimi cu tangka tu nih a kan hmang cang. Tangka hi kan bawi bantuk ah a cang i a hmangtu ding minung tu hi a sal ah kan tang.A poi ngai te! Lairam mipi hmurka ah a larbik mi cu tangka (dollar) hi asi. Dawtnak nak in tangka a au kho deuh i dawtnak cu tangka nih akhuh, mi thinlung tangka nih a uk. Russia phungthluk ah “tangka nih bia a chim ahcun biatak cu daiziar tein a um.” an ti. Tangka bia a hohmanh nih kan elngam lo.

Lakphakti dinnak ah hi tangka te hi timi bianem nih dinnak cu a hlen i a thuhter tawn. Tangka bia chimter zau in khrihfabu a dirhmi kan tam tuk. Pathian duhtaktak nak nun ngei lemtung lo in tangka duh le hmaikhah lo ruang ah bu ai thial mi kan tamtuk. Hihi tha tein ruah ahcun Pathian kan biak si lo in Pathian min kan in lak riangmang i mah pawcawmnak kawl asi rua ka ti. Pathian kan duh ruang ah bu kan in thial si lo in tangka kan tihzah ruang tu ah asi deuh. A hmun taktak mi Pathian hmuhkho lo in tangka nih a rak in hlen kha nai fiangte lai. Cucu tih a nung tuk mi tangka nih minung deu a kan ser cu a si. Mirum tangka ngei cu a lal in kan lal. Mipi zong nih mifim khun le khurkhua tuak kho ah kan ruah hna i an bia chim zong kan lak duh khun. Mifim cathiam asi ko zongah sifak santlai lo asi ahcun a bia chim mi kan eikho deuh lo. Cucu zeiruang ah dah asi? Tangka ngei pa bia kan lakkhawh deuhnak le kan zumh khawh deuh nak cu amah kan zumh ruang le kan tihzah ruangah silo in a tangka le a rumnak ruangtu ah khan a si deuh.

Tangka nih kan thinlung a eidih i kan ri. Tangka ruah ah aherh ahcun lainawn zong kan ngamh ko cang. Hakauhnak hnawm hi kan lungthin ah aa neh tuk cang. Puaisa kan tuah, kan i hleng, kan ithawi , kan i ripawt..hihi tangka nih minung deu a kan ser cu a si ko lo maw?.

Tangka bia cu ahohmanh nih kan alngam lo ruang ah santlailo Laihlum tlangval cheukhat pawl caah nungak dawhthit hi ahar ko cang. Duhnak le dawtnak fek hmanh seh law Lai nungak dawh a nih deuh timi cu tangka ngei pa tang cung theo ah ai pom ko. Nu le pa zong nih fanu le hi tangka ngei pa sin ah thilzuar bantuk le cakuat bantuk in ramtha deuh ah kuat leng mang a si cang. Fanu le nih duh bal lo mi tlangval, muihmai zong rak i hmuh bal lem lo mi tlangval vat ter a hmangmi nulepa hna tlangval bia a chimter tu tangka duh ruang le tangka bia alngam lo ruang ah asi ko lo maw? Nungak le tlangval ai duh cukmak mi le aidaw cukmak mi hna thinlung kuai in mithli he a thenter tawntu hna hi tangka asi ko lo maw? Mah tein duhthim nak nawl a ngei ve mi na fanu dawt, aduh lo mi pa vaatter a hmangmi nulepa cu na fanu dawt deuh ruang nak in tangka na duh deuh ruang le na dawt deuh ruang ah asi kho men.

Nihin Laimi akan thencheu tertu, u le nau taktak karlak hmanh ah dawtnak hri a chattu zawnruahnak ni a phentu ,zarhpi ni hmanh a kan hngalhter tilo tu, dinnak tuah kho lo in mi a khamtu, biadik chim ngam lo in kaa aphit tawn tu hi tangka asi ko lo maw? South timi panih “duhnak paoh hi an mit a caw nain tangka duhtuk mitcaw hi a chia bik ” a ti. Ahman tuk mi a si. Laimi nih a theipar kan zuun cuahmah ko. Tangka lo cun minung kan nunnak tlam a tling kho lo. Asinain tangka duhtuk hi thatnak lei ah lamhruai tu asi bal lo. “Tangka cu saltha cu asi. Nain saya tha cu a si bal lo.

Laimi thinlung tangka nih a ei dih. Tangka bia kan alngam loh. Zeitluk hmanh in rum, tangka ngei ko, vawlei pumpi hmanh hei ngei ko law na nun nak na sungh tung ahcun a miak lailo tiah Bawi Jesuh nih a ti. Vawlei chawva le rumnak nih hnangamnak a chuakter bal lo. Lungthli in lung reitheihnak tu a chuahpi deuh tawn. Laimi nih tangka bia kan alngam hlan lo Lairam ah i then cheunak le lung i khahlonak a chuak peng rih lai. Dawtnak, dinnak, zawnruahnak tbk …hna nak in tangka hmun kan pek peng rih ko ahcun Lairam zeitik hmanh ah a dam lai lo. A zawtnak tu a zual chin leng mang lai. Kan al ngam lo mi tangka bia a al ngamtu Lai pasal tha le nusal tha kan Lairam nih a kan herh.

Note: Catialtu pumpak hmuhning ruahnak a si.

About The Author

Na ruahning rak langhter ve.. (Leave a comment)

%d bloggers like this: