Kum 2 chung ah ngandamnak lei rianṭuantu 70 hrawng thah an tong tiah NUG nih a thanh
The Chinland Post | 2023 March 1 — Hramhram in uknak lak caan kum 2 chung ah ngandamnak lei rianṭuantu 70 hrawng thah an tong i sizung/si-inn 160 leng an SAC phu nih an hrawh tiah February 28 ah NUG nih a thanh.
Cun ngandamnak lei rianṭuantu 900 hrawng an tlaih hna i 780 leng hliam an tuar tiah NUG ngandamnak lei zung nih a thanh.
CNF Headquarters, Camp Victoria, cu SAC nih vanlei in kahdohnak a tuah bantuk in Magway ramṭhen, Myaing peng, Bahin sizung zong Helicopter in a kah. Cun Pale peng, Nwein khua ah an lut i khua ngandamnak zung zong an khangh tiah NUG nih a thanh.
Cubantuk in Sagaing ramṭhen, Ayadaw peng Min khua, Malaytha khua le Kanyin khua hna zong an khangh leng ah High School le sizung hna zong Helicopter in a kah lawng siloin sizung chung ah a um mi sii le sii lei thilri pawl zong an hrawh cicek tiah theih a si.
Cun ramlak ah minung a thlop hnu in a rak kir mi Okpho peng, Myaayethaya sizung in CDM Nurse Daw May Zun Moe zong SAC ralkap pawl nih an tlaih i an hrem leng ah Okpho peng, Htanpinkone khua pawng ah an tlaihrem i an thah beh.
Chin ramkulh, Falam sizung pi in CDM Nurse Daw Thae Thae Win zong a chuahsemnak khua a si mi Katha peng, Moedagyi khua a um lio ah khuachung a rak lut mi SAC ralkap pawl nih an tlaih i an thah tiah NUG cathanh ah an langhter.
SAC nih ngandamnak lei he pehtlai in a doh hramhram mi hi Geneva Convention i UN Security Council biachahnak, vawlei cung phung le ramchung phung hna kha a buar hramhram tiah NUG nih a chim.
About The Author
