July 25, 2024

Lahva Kuang Ah Phungning Lo In Lung A Latu Minung Pathum Lakah Pakhat Tazacuai A Tong

0

Salai Elvis| 2018 March 15| Thantlang khua pawngkam tiva Buva le Lahva kuang ah phungning lo in inntek lunglei Contract lami minung pathum nih lung an lak caah minung pakhat tazacuai a tong tiah thawng kan theih.

Lahva kuang hrawn tiva cu inntek contract lungla mi hna nih tiva chung lung an lak dih caah ngahring dawi awk zong a um lo pin ah lungphawh ding zong um lo tiang in an lak dih tiah theih a si.

Hi kong he pehtlai in “Lahva kuang tiva lung cu nga dornak zong um ti lo in an lak dih caah tuanvo ngeitu ka sawm hna i kan zoh. Sumsang tili phak lai tiang lung an lak dih, tiva kuang chungah motor a kal khawh lonak zong a um ti lo. Tiva chung lung ngan pipi zong an khuai dih. Cucaah Lahva kuang lung an laknak hrawng cu nga cu chim lo phungkeng le lungko hmanh an um ti lai lo” tiah Sangthen No.1 Khuabawi Pu Van Tlir nih TCP ah a chim.
Lungla tu minung pathum chungah minung pakhat lawng theih a si ruang ah Thantlang No.1 khuabwi nih February 24 ah penguk zung ah reportnak ca a chiah.

“Report ca kan tialnak cu sangchung khuabawi le tuanvo ngeitu theihpinak um lo in Lahva kuang lung an lak, Lung an lak ruang i ti nih leikuang a lak lai caah lei ngei mi hna nih an duh lonak, tizu ngalcel zong dornak um lo tiang in lung an lak dih. Cucaah Pu Ni Chawn nih Lung a lakmi cu ngolter dingin ca ka chiah. February 25 ah a minung auh a si i voikhat a lak rih ah cun upadi ning in dantat a si lainak kong penguk zung lei nih ca a chuah cang” tiah Pu Van Tlir nih a chim.

Lakva kuang lung a latu hna cu Pu Ni Chawn, Pu Maung Oo le Sang Hmun nih an lak tiah theih a si. Phungning in lunglaknak License ngeimi Thantlang khuachung ah minung 18 tluk an um.

Hi kong he pehtlai in U Maung Oo nih, “Lahva kuang lunglaknak kong ah keimah nih ka fialmi hna an si lo. Lak zong ka la lo, a la tu nih ka min an hman i a si lai” tiah TCP ah a chim.

Au lio Lahva lung cu mizei sin hmanh ah laknak nawl an hal lo. Lung lak duh ah cun sipin le tuanvo ngeitu hna hnatlaknak ngeih hnu lawng ah lak khawh a si. Lung la mi zong nih phungning tein motor pakhat ah 2500 ngunkhuai pek ding a si tiah theih a si.

About The Author

Na ruahning rak langhter ve.. (Leave a comment)