Malaysia Ramhun Thimnak; Kum 61 Hnu Ah Barisan National Party An Sung I PM Hlun Mahathir Mohamad Nih Teinak A Hmuh
Salai Aung Aung| 2018 May 10| Malaysia ramhun thimnak cu May 9 ah an tuah i Mahathir Mohamad kum 92 pa nih hruaimi Malaysian United Indigenous Party nih teinak an hmuh caah Mahathir cu vawlei cung kum upabik ram hruaitu tuanbia thar a tial tu ah aa cang. Tutan thimnak hi kum 61 hnu ah Barisan National party a hmasa bik thimnak an sungh zong a si.
Kum 92 a si cang Mahathir hi tuan deuh ah ramkhel in a rak i din cang nain amah dirhmi party chuahtak in caan khat lio ah amah aa ralkahmi party ah a lut i amah kuttang ah rian a rak tuan mi Najib Razak cu a zuamcawh i a tei hi a si.
Tutan Malaysia thimnak i Mahathir nih teinak a hmuhmi hi Malaysia ram ah tuanbia a khupthal aa lehnak a si. 1957 thawk in tei tu um loin uknak a tlai zungzal mi Barisan Nasional (Barisan National) Party an sungh hmasabik a si. A luancia kum 61 chung vialte cu Barisan National Party nih teinak an hmuh lengmang i anmah party nih ram an hruai.
Mahathir nih amah hruaimi hi party pahnih fonh in dirh dingmi cozah a si caah fek bik in kan dir kho lai i Malay ah upadi nawlngeihnak biatak tein kan tuan lai tiah a chim. Prime Minister Najib le a minung pawl bel zei an chim rih lo.
Malaysia Parliament ahhin thutnak 222 a um i cu chung ah Mahathir te nih thutnak 113 an hmuh i Najib te party nih 79 lawng an hmuh. Cozah a ser ding Mahathir nih hin anmah party chung lawng siloin party dang in MP a tling mi pawl zong hi cozah sernak ah a sawm khawh men hna ti a si.
Najib hi Barisan Nasional party in Malaysia Prime Minister kum 22 chung a rak tuan bal mi a si. Tutan hi ziknawh eihmuar nak in sualpuhnak kong he a um lio ah thimnak tuah a hung i tei a si tikah hihi mizapi teinak si tiah an ti phah.
Mahathir nih tu lio a umnak party hruaitu hlun a si mi Anwar hi amah Mahathir Prime Minister a tuan lio ah Deputy Minister rian a rak pek bal mi a si. Najib nih nu le pa suanak kong in a hlan ah voi khat thong a rak thlak bal cang i tu zong hi thong chung ah a um lio a si. Cucaah ramkhel thiamsang tampi nih an zumhning ah Mahathir nih hin Anwar hi thonginn in a chuah lai i Prime Minister thutdan a hoih te lai tiah an zumh.
Mahathir hi 1981 in 2003 tiang Prime Minister a rak tuan i 1990s hrawnghrang Malaysia chawlehthalnak lei i cak tak tak in a rak thancho ahhin Mahathir thithruai thiamnak biapi tein a si bik tiah an ti. Khat lei kam ah amah a dohtu ramkhel party le minung pawl phihkhar in a tuah mi thil pawl ruangah soiselnak zong tampi a rak tong len ve.
Ref: Reuters
About The Author
