Maungdaw kahdohnak ah SAC lei in 10 an thi, AA lei zong in a thi mi an um
The Chinland Post | 2022 November 21 – Rakhine ram, Maungdaw khua chaklei, Watcing khua pawng, November 18 ah a cang mi kahdohnak chung ah SAC ralkap 10 an thi, 15 nak tlawm lo an i hliam i AA lei zong in a nunnak liam mi an um tiah AA nih a thanh.
AA le SAC ralkap hna cu a luancia November 18 le 19 ah Rakhine ram, Maungdaw, Buthidaung le Paletwa peng hna ah kahdohnak a rak chuak.
Kahdohnak hi SAC Brigade 77 kuttang phu, LIB 105 phu hna he a chuak i lutaw hngal lo in an zaam caah raltuknak thilri le hriam cheukhat kan lak khawh tiah a thanh.
Kahdohnak chung ah SAC ralkap 10 an thi i hliam a tuar mi 15 leng an si. AA ralkap lei in 1 a nunnak a liam ve i 5 an i hliam tiah a langhter.
SAC nih Rakhine le Chin ramkulh, Paletwa hna ah hriam thazang a chap i cawlcanghnak a ṭhawnter chin caah kahdohnak a fak kho rih tiah AA nih ralrinnak a thanh.
Cun Paletwa hmunhma ah kahdohnak um lo pi in SAC nih hriamngan, Jet vanlawng hna in nifatin a kah i Drone pawl zong in bom a thlak tiah a thanh.
About The Author
