Minister Salai Isaac Khen Nih Rian Aa Phuahnak A Ruang A Fianter
City Hunter| 2018 May 18| Chin ramkulh cozah bu chung in Sipin, Electric le Industry minister zong a si i Chim ramkulh cozah bu chimnak nawlngei zong a simi Minister Salai Isaac Khen cu Myanmar rampi president zung nih May 17 ah rian an dinhter cang. Rian aa dinhnak kong ah The Chinland Post nih pehtlaihnak kan tuah i atu bantuk in fianternak a tuah.
“President zung nih May 17 ah rian dinhnak ca an chuahmi kha a dikmi a si. Keimah zong rian dinhnak ca a kan pekmi May 17 ahkhan tlamtlingte in ka cohlan cang. Hihi rian a kan phuah ruang ah a si lo, rian ka tei lo ruang ah keimah lungtho te in rian dinhnak ca ka tial. Cu rian dinhnak ca ka tialmi kha a kan cohlan caah atu bantuk in rian dinhnak ca an chuah le thawng a kan thanh hi a si. May 17 khan cozah phungningte in ka rian in kaa din cang. Asinain, atu hi Vice President khuallam he pehtlai in minister cheukhat le Chief Minister khual an tlawn liopi a si caah an rak tlun hlan chung cu dawtnak le siaherhnak he tuanvo laak in zung ka kai rih ko lai. An rak kir tikah rian i pekchanhnak le i apnak zong kan tuah te lai” tiah May 18 zingka, The Chinland Post ah sin ah a chim.
Zeiruang ah dah rian naa dinhnak a ruang bik a si tiah The Chinland Post nih kan hal i atu bantuk in a kan leh.
“Keimah nih ka rian tlaihmi ministry tang ahhin zung tampi a um. Ka tlaihmi zung pawl nih rian an tlamtlinh lo le rian an tei lo khi keimah chambau a si. A biapi bik in tutan ah rian dinhnak ca ka tialnak a ruang bik cu; 1). Hakha market pi saknak kong i rian ka tlamtlinh lo ruang, 2). Hakha khuapi sersiamnak kong i rian ka tlamtlinh lo ruang, 3). Falam khuapi dinti peknak kong i ka rian ka tlamtlinh lo ruang ah an si. Rikhiahmi caan chung ah ka lim kho lo, ka tuan khawh lo ruang ah keimah lungtho te in rian kaa dinhnak hi a si. Hluttaw le cunglei upa hna nih rian a kan phuah bia le rian i din a kan ti ruang ah a si lo. Rian ka tei lo ruang ah rian dinhnak ca ka tial i atu bantuk in President nih a ka cohlan hi a si.”
“Hiti rian ka tlamh lo tuk ruang i rian kaa dinhmi cung ah a kan tanpitu, tha a kan petu Chin mizapi vialte nan hmai kan khap bak hna lo. Ka lungtha lo tuk ve. Sihmanhsehlaw, hi rian ka tuan hlan in Chin miphun sersiamnak le thanchonak rian biatakte in a rak tuanmi a si ko cang. Cucaah, hi rian ka tlaih ti lo hnu zong ah ka si khawh chung in Chinram thanchonak le sersiamnak rian cu Chin mizapi he kuttlai in ka tuan thiamthiam ko lai. Hluttaw Speaker le Chief Minister le Chin cozah bu he rian tuanti khawhnak lam ka ngeihmi paoh in lungthote le si khawh tawk in riantuanti kaa tim thiamthiam ko” tiah The Chinland Post ah a chimchih.
Minister Salai Isaac Khen hi Chinram minister lakah fimcawnnak le fimthiamnak lei ah a mak bik, a qualified bikmi a si, amah tluk in a qualified an um lo a timi Chinmi tampi an um ve. Amah hi 2015 thimnak tuah lio ah mizapi nih thimmi palai a si lo, mifim thiamsang dirhmun in minister rian pekmi le laak chommi minister pakhat a si.
Hluttaw Speaker Pu Zo Bawi nih May thla thawkka ahkhan Chin ramkulh cozah bu minung pathum an rian thlenremhnak kan tuah lai. Cuti tuah ding in President sin ah ca kan pek cang. Cu hna cu; Minister Salai Isaac Khen, Minister Pau Lun Min Thang le Minister Pu Sui Thio an si tiah media sin ah a rak chim bal cang tiah kan theih.
About The Author
