Ni 13 A Rauh Hnu Ah Bible Cacaang In A Facebook Status Update A Tuah Than Cang
City Hunter| 2018 May 10| Ni 13 a rauh hnu, May 10, zanlei sang lawng ah Salai Isaac Khen nih a facebook cahmai ah ca a tar (a facebook status update a tuah) than cang. Cu a taarmi cabia cu zeidang kong si lo in bible cacaang a si tiah kan theih.
Salai Isaac Khen cu Chin ramkulh cozah bu chung ah social media (facebook) a hmang bikmi hi Sipin le Electric minister a si. Amah hi Chinram cozah bu chung ah chimnak nawlngeitu pakhat zong a si fawn. Amah tluk in Chinram cozah bu le Chin MPs lakah facebook a hmangmi minister an um lo. Nikhat ah a tlawm bik pakhat tal a facebook cahmai ah ca a tial in share a tuah theu tiah a facebook cahmai kuang zohfelnak in theih khawh a si.
Sihmanhsehlaw, April 27 ah a donghnak bik a facebook cahmai ah ca a tial a si. Cu hmanh cu Chuncung i Stawberry dum a kalnak kong a si. Cu, April 29 ah amah pumpak tialmi si lo in a status ah share pakhat a tuah. Cu thawk in cun May 10, zanlei suimilam 4:00 tiang a facebook cahmai kuang ah zeihmanh ca a tar in a status update a tuah ti lo. Cun, lamhlat ah khual zong a tlawng lo, tu hrawng cu nifate zung a kai lengmang ko tiah theih a si.
Ni 13 tluk a rauh hnu May 10, suimilam 4:30 tluk ah a facebook cahmai kuang cu bible cacang taarnak in a hun tharchuah (a status a update) than. A tarmi bible cu; Job 14:7-9 ““Thing caah cun ruahchannak a um, Hau a si hmanh ah, a corh ṭhan lai i a nge hna cu an dong lai lo. ” “Vawlei chungah a hram cu tar in vawlei ah a hmui cu thi hmanh seh law, ” Ti rim a theih cangka a corh ṭhan lai i thing langno bantukin a nge an borh ṭhan ko lai timi a si.
Chin ramkulh hluttaw Speaker Pu Zo Bawi nih, minister cheukhat rian phuahnak le rian thlenremhnak tuah an si lai tiah media sin a chimmi minister pathum lakah Sipin le Electric minister Salai Isaac Khen hi aa tel. A dang minister pahnih cu Social Affair minister Pau Lun Min Thang le Lam le Sul lei Pehtlaihnak minister Pu Sui Thio an si. Chief Minister nih President sin ah minister cheukhat rian phuahnak le rian thlennak kong cu President ah ca a pek tiah hluttaw Speaker sin lila sin in theih a si.
Hi ruang ah minister Salai Isaac Khen hi a lungrawh in a facebook a update ti lonak a si hnga maw tiah a ruatmi media cheukhat an um tiah kan theih. Hi kong he pehtlai in, “Facebook status tar le taar lo cu pumpak kong a si ko nain tutan hiti thil a cangmi hi minister lakah thli a hrangmi kong he aa pehtlai kho. Atu ah bible cacaang a taarmi zoh than tikah rian an phuah cang i maw a si hnga, phuah an duh ko nain an phuah khawh lo bia dah a si hnga timi ruah awk tampi a um. Amah ah thil aa fiangmi um cang dawh a si” tiah tualchung media riantuantu journalist pakhat nih The Chinland Post ah a chim.
Chin ramkulh NLD upa he aa naihniammi upa pakhat nih, “Tutan Chief Minister nih ca a pekmi ahhin minister pakhat cu rian phuah ding in ca an pek ti ka theih. Asinain a rian an phuak lai maw, a rian tlaihmi dah an thlen lai timi cu chim awk a tha rih lo. An i tinhmi hlawhtlin cun rian phuah a um ko lai” tiah a hmuhning cu May 8 chun, The Chinland Post ah a chim cang.
Rian phuah a um lo sual ahcun rian thlenremh dingmi minister hna cu; Minister Pu Sui Thio, Minister Pu Pau Lun Min Thang, Minister Salai Isaac Khen an si. An rian hmunhma i thlen ding cu; Pu Sui Thio hmun ah Pau Lun Min Thang, Salai Isaac Khen hmun ah Pu Sui Thio le Pu Pau Lun Min Thang hmun ah Salai Isaac Khen ti in rian an i thleng lai ti thawngpang a leeng tiah kan theih.
Hi rian thlenremhnak kong cu a rauh hlan ah aa fiang ko lai tiah Pu Zo Bawi nih a chim. May 14 ah ramkomh cozah tonpumhnak an tuah lai. Khi tikah Chinram lawng si lo in ramkomh minister le Chief Minister cheukhat rian thlenremhnak a um lai i zapi theih in thanh a si te lai tiah media cheukhat sin in kan theih.
Hika link ah http://thechinlandpost.info/chin-ramkulh-minister-cheukhat-rian-dinhter-le-rian-thlenremhnak-biathli/
“Chin Ramkulh Minister Cheukhat Rian Dinhter Le Rian Thlenremhnak Biathli” timi relchap khawh a si.
About The Author
