NLD MP Pathum Dantat Ding In Central NLD Party Nih Biakhiahnak An Tuah
City Hunter| 2018 April 23| NLD (National League for Democracy) party in MP pathum cu party zulhphung ning he dantat ding in April 22, Rangoon ah tuahmi Central NLD party (CEC) committee nih biakhiahnak an tuah.
“Ramkomh hluttaw palai (MP) pakhat le ramthen hluttaw palai (MP) pahnih cu party zulhphung ning in dantat ding ah CEC nih kan fehter cang. A dikthliar cu chimh awk a tha lo. A biapimi in party zulhphung an buar ruang le an rian tlaihmi tangka cazin an tonghthamnak ah ningcangte in rian an tuan lo ruang ahhin a si ko. Hihi Keimah nih tuanvo ka laakmi hluttaw palai reportnak zung in an hmuhchuahmi kha CEC nih biakhiahnak tuah ding in ka chuahpi tikah atu bantuk dantatnak pek ding in biakhiahnak an tuah hi a si” tiah Dr. Myo Nyunt nih a chim.
April 22 ah tuahmi CEC tonpumhnak ah June thla ah tuahdingmi avoi hnihnak party conference palai pawl thimnak kongkau, riantuantu kongkau committee ah thazaang chap ding kong zong biakhiahnak kan ngei.
Cu pin ah U Win Htein nih tuanvo a laakmi CEC riantuantu kongkau committee haotu rian cu CEC chungtel U Han Thar Myint tuanvo pek ding in biakhiahnak an tuah. U Win Htein cu khuahun chungtel a si caah U Han Thar Myint nih tuanvo a laaknak hi a si tiah Dr. Myo Nyunt nih a chim.
Naite March 30 i NLD party CEC phu an ser hnu ah party zung hmunpi i a hmasa bik meeting an tuah ah atu bantuk in palai pathum dantat ding in biakhiahnak an tuah hi a si. Atu ah report an tuahmi catlap chek rih lomi 50 tluk a taang rih. A tamdeuh report ca cu thil sining a tling lomi an si.
NLD party chungtel Pyithu hluttaw palai a simi MP Dr. Soe Moe Thu, U Nyan Lin le U Sein Win cu 2016 ah party rian in dinhter tiang dantat an rak tong. Cu pin ah Mon ramkulh Chief Minister hlun U Min Min Oo cu report an tuah ruang ah party nih chekhlatnak an tuah hnu 2017 ahkhin a rian in a chuak/aa din.
Ref: 7Day Daily News, DVB Burmese
About The Author
