Ronaldinho pumpululh chuih in a din cang
Ronaldinho nih Brazil F.C caah caption a tuan lio, Ref. Goal.com
Chinland Post, 2018, January 17| Vawleicung ah pumpululh chuihthiam bik ram pakhat simi Brazil in minthang Ronaldinho cu pumpululh vawlei in a din cang tiah theih a si.
Kum 37 a simi Ronaldinho hi FIFA nih pekmi vawleicung pumpululh chuihthiam bik laksawng 2004 le 2005 ah voihnih tiang a hmumi Brazil rampi caah a celhmi lawng silo in ram dang club zong ah a celhmi a si.
Pumpululh chuih a thawknak hi anmah Brazil ram i club simi Grêmio in a si. Cun, Europe lei ah a thial i, Paris Saint-Germain ah a chuih. Cuhnucun, Spain ram i club minthang Barcelona, Italy ram i AC Milan tbk. club hna ah a rak chuih.
Ronaldinho a dinhnak ding kong he pehtlai in, a unaupa le amah agent simi Roberto Assis nih thawngzamhtu sin ah an chim.
“Ronaldinho nih ka kum upa tuk cang, biatakte in cawlcangh ding ah a har cang tiah a ti.”
Ronaldinho cu Brazil ram caah 1996 thawk in U-17 ah siseh, 1999 ah U-20 ah siseh, 1998-2008 tiah ah U-23 (Olympic ah chuihmi telhchih in) ah siseh, 1999-2013 tiang Brazil rampi caah a rak i celhmi a si.
Ref.: The Guardian/Ronaldinho Bio
About The Author
