Takaung Khua Lak Kahdohnak Ah SAC Chungtel 64 An Thi, 20 An Tlaih Hna
The Chinland Post | 2024 August 14 — Mandalay ramṭhen, Pyin Oo Lwin pengkomh, Thabyeikkyin peng, Takaung khua lak kahdohnak ah SAC chungtel 64 an thi i 20 a nung in an tlaih hna tiah NUG, Ministry of Defense kuttang, No. 1 kahdohnak hmunhma nih August 13 ah thawng an thanh.
PDF phu pawl nih Takaung khua hi a luancia August 11 zinglei ah kah hram an thawk i August 12 zaanlei ah an lak khawh hi a si.
Takaung khua kahdohnak ah SAC lei Lt. Colonel Ye Khaung le Major Moe Tun hruai mi Ṭah-Ṭah-Kah 13, Major Moe Win hruai mi Sah-Khah-Ta 2, Palek bawi Aung Ko Win hruai mi palek phu, G.A.D zung, sizung le palek sakhaan hna cu August 11 ah an lak khawh i Pura umnak hmun cu August 12 ah tlamtling tein an lak khawh hi a si.
Cu khua lak kahdohnak ah SAC lei hriam, phun 83, kuan 14,000 leng le bom 130 hrawng an lak khawh i PDF lei hriamtlai pahnih nih ram le miphun caah an nunnak an pek tiah cathanh ah an langhter.
Takuang khua lak kahdohnak cu No.1 kahdohnak hmunhma, Mandalay ramṭhen zung hruainak in Battalion 3, No. 511 battalion, Mandalay pengkomh Battalion 4, Mandalay pengkomh Drone phu le Tabyeikkyin peng PDF hna an i bawm tiah theih a si.
About The Author
