Thantlang Ah GTHS Sianginn Saknak Ding Hmunhma An Zoh
Salai Elvis| 2018 May 6| Thantlang khuachung ah Government Technical High School (GTHS) sianginn saknak ding hmunhma cu May 5 ah Hluttaw palai hna, sipin, vawleitahnak zung, sangchung khuabawi, penguk zung, Hakha GTI Prensiple Dr. Tluang Za Thang le tuanvo ngeitu hna nih a voikhatnak hmunhma an zoh tiah kan theih.
Hi hmun an zohnak cu Tlangrua lam lei ah a si i, Ekah 20 tluk hmunhman an zohchung.
“A hmun lawng zoh a si rih caah zeihmanh aa fiang rih lo. Asinain cunglei rianngeitu nih an ka fial caah a tubantuk in hmunhma kan zohchung hi a si. Hi pin ah rian a tamtuk rih, a hmun ngahnak ding caah 105, 106 le a herhmi vialte zong tuah ta hmasa a hau. 2018-2019 kum budget (tu kum October 1) ah hal dingin suaisam chung cia a si ko. Hi chungah a tlam tlin le tlin lo zong theih a si rih lo. Hi sianginn saknak caah keimah pumpak ruahchung mi nuai 1,000 cu a herh te lai” tiah Hakh GTI sianguk Dr. Tluang Za Thang nih TCP ah a chim.
Hi sianginn a kaimi hna cu a bik in Field Worker le Technecian tiang chuah kho ding tiangin saduhthahnak ngeihpiak a si.
“Tangriat awngmi paoh in kai khawh a si lai i, tanghra sung zong nih thianhhlimhnak le Scurity rian zong tampi tuan khawh a si lai i ramdang kal zong a tha ko nain kal hau lo in rian an ngei kho lai, Degree la cia rian ngei lo hna zong cazi rian le Engineer pawl zong cachimtu ah hman khawh an si lai i rian tampi a lawng lai. Mino hna hlawknak tampi a kan pek khawh lai. A biapi in tinhmi cu Field worker le Technician tampi chuak hna seh ti saduh thah a si” tiah Dr. Tluang Za Thang nih a chim.
Hi sianginn cu Chinram chungah Mindat le Tedim ah a um cang i a rauh hlan ah Paletwa le Falam an tuah colh ve lai. A tubantuk in Thantlang zongah ah tuah dingin timhtuahnak an ngei than tiah theih a si.
About The Author
