Thantlang le Mindat Ah SAC Nih Vanlei In Thazang A Chap
The Chinland Post | 2024 September 4 — Chin ramkulh, Thantlang le Mindat khua um SAC ralkap sakhaan pawl cu eidin le kuanzen pawl a chap tiah theih a si.
Mindat khua hrambunh LIB 274 ah SAC nih Y12 vanlawng in September 3 ah parachute (လေထီး) hmang in eidin le kuanzen pawl a chap hna i August 31 ah voikhat a rak chap bal cang tiah Mindat lei thawngzamh nih an rak langhter.
Vawlei lei in a kal kho ti lo mi SAC nih Mindat peng chung um khuate pawl cu August 30 le August 31 ah 500lb a rit mi bom pawl a thlak tiah theih a si.
Cubantuk in vanlei kahdohnak a tuah lengmang rih caah SAC ralkap he kahdohnak a chuak kho mi dirhmun a si caah mipi hna nih a bu in um lo ding le bomkhar pawl i cawh ding in CDF-Mindat nih an rak thanh fawn.
Cubantuk in kahdoh a fahnak Thantlang khua um SAC ralkap pawl sin ah Y-12 vanlawng in eidin le kuanzen pawl cu August 30 ah voi 6 a rak thlak i cheukhat cu Chin dothlennak phu pawl nih an lak khawh tiah theih a si.
Chin dothlennak phu pawl nih an lak khawh mi hriam chung ah MA kuan 2,000 le Energy Bar pawl aa tel tiah theih a si.
Thantlang khua ah SAC ralkap nih hram an bunhnak LIB 269 cu dothlennak phu pawl nih an rak lak khawh hnu ah khuachung tlakrawh innṭhing pawl ah SAC ralkap pawl an i thuh caah kahdohnak hme a chuak pah lengmang tiah theih a si.
Thantlang khuachung ah 2021 September thla thawk in SAC ralkap le dothlennak phu pawl karlak ah kahdohnak a chuak i SAC ralkap nih mipi an khangh caah khuami 10,000 hrawng cu a pawngkam khuate pawl le India, Mizoram hna ah an rak zaam.
About The Author
