July 25, 2024

Yedashe kahdohnak ah SAC ralkap 30 leng an thi, hriam le an fir mi thilri tampi zong PDF nih an lak khawh

0

The Chinland Post | 2023 February 20 – Khuate pawl a khaang i a rak kir mi SAC ralkap pawl an kah hna i SAC ralkap 30 leng an thi, hriam le an fir mi thilri pawl zong kan lak khawh tiah Bago Region PDF nih a thanh.

Bago ramṭhen, Taungoo pengkomh PDF Battalion 3501, Company 4, Company 6 phufonh hna le SAC ralkap karlak ah February 16 zinglei sml 9:00am in chun sml 1:00pm tiang Yedashe peng Zayityoekung khuate le Pingthilar khuate nitlak lei ah kahdohnak a chuak i SAC lei in 30 leng an thi i tampi hliam an tuar tiah Bago Region PDF nih an langhter.

Kahdohnak chung ah SAC ralkap pawl an ruak lawng si lo hriam le mipi inn in an fir mi suingun cheukhat zong an lak khawh tiah an thanh.

Kahdohnak chung in an lak khawh mi hriam hna cu MA3 zuun 4, MA11 zuun 2, MA2 zuun 1, Kuanbawm 18, kuan 520, 60MM bom kuan 2 le eidin tampi hna an si tiah theih a si.

Kahdohnak chung ah a sung tuk mi SAC ralkap pawl nih hriamngan/hme an kah thlorh ruang, mipi an velh hna ruang ah mipi 2 an thi i 2 fak pi in an i hliam tiah an thanh.

About The Author

Na ruahning rak langhter ve.. (Leave a comment)