Zophei Pumpululh Chuih Zuamnak Tlamtlingte In An Dih; Aibur Nih Champion An Lak
Salai Pa Thawng| 2018 May 5| Zophei Christian Youth Fellowship hruainak in Leitak Modern ah April 30-May 5 tiang tuahmi pumpululh chuih zuamnak cu tlamtlingte in an dih i Aibur nih pakhatnak an lak tiah kan theih.
Tutan Pumpululh chuih zuamnak cu a hlunghlai ngaingai ko. Chin ramkulh hluttaw chiarman Pu Zo Bawi, Pu Khua Uk Lian (CNF), Pu Hrang Tin Thai (CNA) le an naule pathum, Salai Za Ceu Lian (Yangon), Salai Za Hum Mang (USA) le Salai Ram Tin Thei (Australia) nih an telpi khawh hna i a hlunghlai ngaingai ko.
Zophei Christian Youth Fellowship(ZPCYF) cu 2009 in rak dirhmi a si i kum hnih dan in Zophei mino hawikomnak caah lentecelhnak hi rak tuah tawn a si i tutan hi avoi 5nak an tuah a si. Tutan ah ZPCYF cu Zophei Youth Organization(ZPYO) tiin an thlen. Tutan a sunlawi khunnak cu Zophei chungin bochan mi kan pale zong nih an kan telpi caah kan i lawmh khunnak cu a si.
Pu Zo Bawi nih siaherhbia a chimhmi cu, “Chinram khualipi ah zungkip nawn in lutlai hi Laimi kan um tuk lo. Kanmah kan chan lioah cun degree pakhat kan lak paoh ah a za kan rak ti. Nain tuchan ahcun cu lawng a za ti lo. Cawn awk tampi a um caah kan no lioah cawng lengmang hna u suhlaw MA, Ph.D tiang hmanh cawn in Zungkip lutlaitu si kho dingin kan i zuam cio hna lai” tiah a chim.
Hlasatu ah Samari (Aibur) sawm a si. Vollyball bengh zuamnak ah nu pakhatnak Hmawngtlang, pahnih ah Leitak Modern, pa pakhatnak Hmawngtlang, pahnihnak Zephai B an si.
Pumpululh chuih zuamnak cu Aibur le Zephai-A final an kai i goal 2 veve in an i tluk i minutes 10, minute 10 in chap an si hnu ah Aibur nih 3-2 in an tei hna caah 2018 Zophei Youth Organization lentecelh zuamnak ah Aibur nih Champion hrai an thlir tiah kan theih.
About The Author
