Matupi-Paletwa Lamcung Kahdohnak Ah SAC Lei 52 Kan Thah Khawh Cang Hna Tiah CDF-Matupi Nih A Thanh
The Chinland Post | 2023 April 3 — Chin ramkulh, Matupi-Paletwa lamcung ah a um mi Thaebwe sakhaan ah eidin a rak chap mi SAC ralkap mawṭaw 3 cu voi tampi an kah hna i SAC lei 52 an thi cang i mawṭaw 1 kan hrawh khawh tiah CDF-Matupi nih a thanh.
March 20 ah Matupi in Thaebwe sakhaan ah eidin chap ding in SAC ralkap 150 hrawng nih an i cit mi SAC ralkap mawṭaw 3 cu March 20 thawk in CDF-Matupi phufonh nih an kah hna.
March 27 chun i Matupi-Paletwa lamcung mengtung 21 ah zaanriah a chuang lio mi SAC ralkap pawl an kah hna i 12 an thi, tampi an i hliam tiah an thanh.
March 29 zong ah, mengtung 22 ah bomrap an puah hnawh ṭhan hna i ke 12 ngei mawṭaw lamtlang ah a tla i CDF-Matupi nih an khangh beh.
March 29 i bomrap an puah hnawh hna lio ah ke 12 ngei mawṭaw a rawh lawng siloin SAC ralkap 5 an thi tiah an langhter.
Cu ni zaanlei ah Kala khua kahdohnak voikhat, Kala khua luhnak ah voikhat bomrap kan puah hnawh hna i SAC ralkap 13 tiah an thanh.
Cubantuk in March 31 zinglei ah, Kala khua ah kahdohnak a chuak ṭhan i SAC ralkap 3 an thi tiah an langhter. Cucaah SAC ralkap pawl nih mipi inn 9 an khangh tiah theih a si.
SAC ralkap pawl kham le doh rih an hauh caah hriam bawmhnak kan herh rih ko tiah CDF-Matupi nih bawmhhalnak zong an langhter chih.
About The Author
