Atutan ASEAN Summit cu Kawlram buainak kong lawngte nih a hun khuhcilh.
Prime Minister Hun Sen (Combodia) nih “a ralai mi EU-ASEAN Summit ah Kawl ralkap hi sawm an si rih lo kho men” a ti. Min Aung Hlaing an sawm ahcun EU lei in lutlai kai duh loin protocol a niam mi lawng an kai lai, ti an phan caah a si tiah cheukhat media nih an langhter.
ASEAN Chair a tlai chom dingmi nih atu bantuk a hun chim thluahmah cu thil tha a si.

Nitlak ram theo kan ti lai. Hi kong hi tuan deuhpi khan lam an rak ser cia cang. ASEAN Summit ah Kawl ralkap sawm lo ding tiah bia a chuah lio ah khan ASEAN-Related Summits [tahchunhnak ASEAN-US, ASEAN-China, ASEAN-Japan, ASEAN-EU tbk] ah sawm chih lo ding in US le EU lei palai pawl nih ASEAN Foreign Minister cheukhat sin ah siizungzi an rak tuahcia cang.
ASEAN chungtel Foreign Ministers cu ASEAN Summit tawlrelnak tuanvo a ngeimi [Coordination Council] an si. Tikah, Kawl ralkap hnon nakding ah annih pawl ruahnak hi tawhtlaitu pakhat a si ve. Atutan hnon an simi zong hi Foreign Ministers meeting in a chuak mi kha a si.
– US President Biden nih nizan cu a hun telpi ve hna i biachimnak a ngei. Kawl ralkap nih uknak a lakmi cu a hun mawhchiat; “horrific violence” tiah a pin ngai mi biafang a hman. Thongtla chuah ding, kahdohnak tuah ti lo ding le democracy lam cung ah zawh than ding in forhfialnak a hun tuah.
Thai Prime Minister Prayut belte hi khat lei khat lei ruat thiam ngai phun in bia a chim. Kawlram ah daihnak a um ding kan duh piak hna, a ti. ASEAN Five-points Consensus tuanchuah ding in forhfialnak a tuah.
Singapore Prime Mister Lee Hsien zong nih mah thiam hi a hun forh ve; ASEAN he cooperate tuah deuh ding in a ti.
Five-point Consensus tuanchuah ding hi khat lei cun Kawl ralkap caah hnahnok ngai a rak si. Ziah tiahcun ka tuanchuah lo zong a poi lai lo; an philh [ASEAN nih] te ko lai ti phun in a rak i ruahcia. Nain tuanchuah ding in biatak ngai an hun nawr caah atu dirhmun an phaknak a si.
A tuanchuah lo cun buainak a karh chin vima ko lai.
Hi kong ah US, EU le China te pawl nih a phen in hmalaknak tampi zong a rak i tel ve. A dang tein ka hun virhkhoih than te lai.+++
June Nilian Sang

About The Author

Na ruahning rak langhter ve.. (Leave a comment)

%d bloggers like this: