????? ?? ???? ?????? ?????? ??????? ??? ???? ???? ????: ??? ???? ??????? ? ?? ??? ????
ASEAN Summit [meeting] cu tuchun thawk ding a si cang.
Hi Summit kai ding sawmnak ca cu Kawl ralkap sin a phan cang. Nain, kan hnu zarh ka tial cia bang Min Aung Hlaing kai ding in sawm a si lo. Kawl ralkap nih a control mi Foreign Ministry tang i Director General Chan Aye minbunh in [non-political representatives] an kan sawm, tiah Zaw Min Tun nih a fianter.
Zahan ah Kawl ralkap nih “Kan bawizik [Min Aung Hlaing] a kai khawh lo hmanh ah Minister level tal a kai awk a si” tiah cathanh in lehnak an tuah.
Nuar dawh an si. Director General an sawmmi zong hi Kawl ralkap nih kaiter thai lo dawh a si. BBC Burmese nih cun Kawlram ca thutnak a lawng lai, a ti.
Cu lio [Nizan] ah Dr. Cynthia Maung [NUG lei tang] cu ASEAN meeting kai ding in an sawm tiah thawngpang a chuak. Dr. Cynthia Maung cu media nih an hei pehtlaih i, “an ka sawm lo” a ti hna. Thawng deu a si tinak.
Nain, Kawl ralkap lei nih Director General tal an thlah lo ahcun NUG lei caah [hmai lei] Kawlram aiawhtu minung thlahnak hi caantha a si kho te hnga maw tiah ruahding a hun um.
NUG nih “ASEAN Summit ah kanmah rak kan kaiter uh tiin halnak ca ASEAN sinah a kan kuat” tiah Malaysia Foreign Minister nih a chim bal. ASEAN kal ningkel in hun cuanh ahcun Kawl ralkap hmanh hnon lio ah NUG tu hun kaiter ding cu thil harsa ngai a si.
Nain, ASEAN nih non-political representation tu cu “Kawlram caah” innka kan on (reserve) lai an ti. Tikah, Kawl ralkap nih aho hmanh a thlah lo ahcun NUG lei caah caantha a si kho hnga maw tiah hun ruah chukcho ding khi chim duhmi a si. Ruahchannak a um tinak cu a si lo.
Kawl ralkap nih aiawhtu mizei hmanh a thlah thai lo belte ahcun ASEAN Five-point Consensus tuanchuah nakding ah harsatnak a hun um chin vima kho.
Anmah [Kawl ralkap] meeting an kai ve lio i, an rak chah cia mi hmanh zulh an i harh tuk. Atutan anmah tel lo i biaceih mi le biachahmi hun zulh piak ding cu ruahchan awk a har chinchin.
Amahbelte, ASEAN nawl an zulh lo deuhdeuh ahcun ASEAN chungtel pawl nih hnu an chit deuhdeuh ve hna lai. An karlak buainak cu san chin vima dawhdang in a um lio a si.
Khat lei in, Malaysia Foreign Minister nih “nan i duada tuk ahcun NUG lei kan pehtlaih mei hna lai” tiah Kawl ralkap a rak tlerhkhonh bal cang fawn hna.
Cucaah Kawl ralkap an nuar deuhdeuh ahcun NUG caah hmunhma a um te kho. Amahbelte, NUG nih hmunhma an lak ahcun a buaitlak (complicated) ngai te lai. Five-point consensus zong kha san a tlai te lai lo i lamdang tu kawl a hau te lai; hihi ASEAN nih an phan mi ah aa tel tiah BBC nih cun an ti.
Cu dirhmun a phanh sual ahcun China, US le India hrawng nih khin ASEAN le Kawlram karlak ah lamkaltu (mediator role) si phun khi hun i cuh a hau hnga. Buainak cu a tlaptlap in ai thuah te ko hnga.
Zei va si khom ah, Kawl ralkap nih ramleng hawi a ngeih lo kha zapi kan duhmi a si ko caah a buai paoh kha Kawl ralkap caah sungh a si ko.+++
June Nilian Sang
About The Author
