USDP Mino in Salai Duh Tlun le Chin Digest Biahal Biaruahnak

0

Duh Tlun

Chin Digest Vol. 6, No. 4–

USDP Mino in Salai Duh Tlun le Chin Digest
Biahal Biaruahnak

Chin Digest: Min, Khua, Cacawnak, hmuhton mi, atu dirpi mi party min, atu ṭuan lio mi rian hna tawifiang tein na kan chim kho hnga maw?
Duh Thlun: Ka min cu Salai Duh Tlun ka si. Thantlang peng, Congthia khua ah a chuak mi ka si. Kalay University ah Master of Science (Physics) in a dih mi ka si. Siangnakchia hruaitu (President) dirhmun in Zophei, LSSB (Kalay) le Chin Student Union…tbk ah kum tampi a cawlcang mi ka si. Atu ka dirpi mi party hi USDP a si. Chin Galaxy Private High School ah cachimtu dirhmun in rian a ṭuan lio mi ka si.

Chin Digest: Party tampi chung ah atu na dirpi mi party hi zeiruang bik ah dah na thim?
Duh Thlun: Hi party ka thimnak a ruang cu kan rampi democracy ram si nakding ah a kalpi hmasatu a si pin ah tlangcungmi kong ah biatak tein rian a ṭuan tu a si caah a si.

Chin Digest: 2020, thimnak caah nan Party mino cawlcanghnak theih kan duh ko?
Duh Thlun: 2020, thimnak ah hin mino cawlcanghnak a ṭha ngai in kan hmuh ko. Thantlang hna ah cun party vialte lakah party thazaang hmuhsaknak a tuah hmasa bik kan si. Mino nih lungthawhnak men in ramkhel ah tel si loin ramkhel kong biatak te fian hnu ah ramkhel chung ah i tel ding hi kan saduhthah a si. Cu tikah, mino hi party zung ah cawnpiaknak kan ngeih hna hnu ah mipi caah a ṭha mi thil tuahnak hmurhuh (mask) phawtzamhnak…tbk in kan cawlcanghter hna. Thimfung thlak ning cawnpiaknak he pehtlai zong in mino pawl an cawlcang rih ko lai.

Chin Digest: Nan party mino cawlcanghnak ah buaktlak in mino zeizat hrawng dah an i tel kho?
Duh Thlun: Caan hman in cawlcanghnak ah ai tel kho mi hi mino 50 in 100 kar lak hrawng kan si tawn.

Chin Digest: A luacia mi Ramkomh Kawlram Thimnak kan zoh tikah Mino cawlcanghnak kan hmu tuk lo. Tutan, thimnak ah hin mino cawlcanghnak hi a lumsa ngaingai. Khoika in dah ramkhel ṭhanghphawhnak a ratnak a si hnga?
Duh Thlun: Tukum ah mino cawlcanghnak a lumsa ngai in a umnak cu 2010 in thok mi democracy ram chung ah kan kal cuahmah tikah atu cu kum 10 chung deng a si cang. Mino hna nih democracy si ning kan i fian deuh cang caah lumsa deuh in ramkhel ah kan i tel a si rua tiah ka ruah. Aa ṭhangphawhnak hi cu kan lungchung ah hram a bunh cang mi democracy pek mi covo hngalhfiannak in aa thawk mi a si tiah ka ruah.

Chin Digest: 2020 Thimnak caah mino nih mah le pom mi party cio dirpi a si. Ruah ning le pom ning a kalh ngaingai. Hi nih hin thimnak dih hnu ah zatlang nun a buaiter lai maw asiloah a remh chin lai dah?
Duh Thlun: Pom ning le ruah ning a dan ruangah kan zatlang nun ah buainak a chuak deuh lai ti cu ka ruat lo. Kan i dannak hi ram ca ṭhatnak kan hmuh ning ruangah a si ti in kan ruah thiam a herh. Ramkhel kong hmuh ning kan i dan ruangah kan zatlang ah buainak chuahtertu kan si ahcun democracy phung fiang tein kan nunnak ah a um rih lo tinak a va si hnga!

Chin Digest: Nan Party Policy lakah na uar bik mi pathum in na kan chim kho hnga maw?
Duh Thlun: USDP policy lakah ka uar bik mi cu, pakhatnak ah, zungzal remdaihnak policy (peace policy), pahnihnak ah tlangcungmi mahte khuakhan lairel khawhnak kan ngeih nakhnga federal ram ser ding, le pathumnak ah sifahnak zorchuknak tuah ding hna hi an si

Chin Digest: Nan party cawlcanghnak ah a chambaunak asiloah a tuah awk rian pahnih te in na kan chim kho hnga maw?
Duh Thlun: USDP party chung ah a chambau deuh tiah ka ruah mi cu pakhatnak ah atu lio cozah rianṭuannak i a chambau mi kong hmuhsaknak an tuah mi a tlawm tuk tiah ka ruah. Cun, party minung nih zumhawktlak tein an um khawh nakhnga cawnpiaknak a rak tlawm deuh rua tiah ka ruah.

Chin Digest: Candidate aa cuh ding mi pakhat nih a tuah hrimhrim awk pahnih in na kan chim kho hnga maw?
Duh Thlun: Candidate a cuh mi pakhat nih a tuah hrim awk pakhatnak cu a dik mi ramkhel a kalpi a herh tiah ka ruah. Cun, a tak in a tlinh khawh ding le a tuah khawh ding kha chim i mipi he naihniam tein a um peng a herh tiah ka ruah.

Chin Digest: Atu na dirpi mi party hi tartlung tiang in ka dirpi ko lai tiah na ruat maw?
Duh Thlun: Atu ka dirpi mi party hi tartlung tiang ka dirpi ko lai ti hi cu chim awk ah a har ngai in ka ruat. Mino kan si rih i hmai lei thil sining tu kan zoh hmasa a herh rih tiah ka ruah.

Chin Digest Vol 6, No. 4 A Phaw (Cover)

Chin Digest: 2020 Thimnak ah nan party hi mino cawlcanghnak nih zeitluk in dah a bawmh khawh tiah na ruah? Mino cawlcanghnak um hlah sehlaw, zei dirhmun dah an si hnga?
Duh Thlun: 2020 thimnak ah mino cawlcanghnak nih tampi a bawmh . Mino thawngin mipi nih USDP party sining fiang te le ṭha tein an hngalh khawh. Thimfung kawlnak kong zong ah tampi a kan bawmh. Mino cawlcanghnak rak um hlahsehlaw, kan thazaang a der deuh ko lai tiah ka ruah ko.

Chin Digest: 2020 Thimnak ah nan party nih teinak an hmuh ko lai ti na zum maw? Zeiruang ah?
Duh Thlun: 2020 thimnak ah teinak kan hmuh lai tiah ka ruah ko. A ruang cu a tu kan cozah nih mipi bia a kan kamh ning in rian a ṭuan lo pin ah tlangcungmi kan covo zei ah a rel lo ti kha mipi nih an hngalh dih cang. Cu pin ah, kan party cu tlangcungmi kong ṭha tein a ruat mi a si, hawikomh a duh mi party a si, a biakam ning tein rian a ṭuan mi a si kha mipi nih an hngalh caah teinak kan hmuh lai tiah ka ruah ko.

Chin Digest: Ramhun thimnak ah a minung le party kong ah hin ruahnak aa kalh ngai tawn? Nang, zeitin na pom ning a si?
Duh Thlun: A minung maw a biapi deuh, party dah ti ahcun an pahnih in an biapi veve ko. Asinain, zeidah a biapi deuh ti a si caah minung a biapi deuh tiah ka ruah. Party policy cu minung ser mi a si bang, cu policy tling tein ṭuan chuahtu ding cu minung a si caah minung hi a biapi deuh tiah ka ruah.

Chin Digest: A ra lai mi 2025 Thimnak ah candidate i cuh ve ding in timhtuahnak na ngei maw?
Duh Thlun: Timhnak ka ngei lo.

Chin Digest: A donghnak ah mino le mipi cungah 2020 Thimnak kong he pehtlai in biasiaherh chim na duhmi?
Duh Thlun: Kan mipi le mino nih kum 5 dan ah voikhat kan duh mi cozah ser khawhnak nawl kan ngeih caah kan thimfung hi ṭha tein ruah hnu lawng ah pe hna usih. Lungthawhnak le mi chimh chom in kan ramkhel kan kalpi ahcun kan duh mi ram kan phanh khawh lai lo caah kan duh mi ram kan phak khawh nakhnga daihnak a ser i tlangcungmi kan caah lam a kan sialpiaktu sin ah kan thimfung pe cio hna usih. Kaa lawm, nan dihlak Bawipa nih thluachuahnak in pe ko hna seh!


Chin Digest Vol. 6, No. 4 (November 2020) ah chuah mi a si. Cauk a phanh khawh lo nak a tam caah Online in thazaang a kan petu caah kan rak thlah ṭhan mi a si. ~ Editor

About The Author

Na ruahning rak langhter ve.. (Leave a comment)

%d bloggers like this: