SAC Ralhrang Nih Chindwin, Kalay Valley An Runvennak A Ruang

Salai Bawi Lian Sang | 2021 August 20 —

Shwebo Valley

Myanmar ram hmun lai bik a simi le Kachin ramkulh lei kalnak lam ah Shwebo pengkulh chungt ah Shwebo, Wat Let, Khin Oo, Ta Ze, le Dibeyin hna an um. Ayeyarwady tivapi a hnulei kap Chindwin tiva i hmailei kap a ummi le raldohnak ah hmun rem ngai a simi Shwebo pengkulh chungtel khuate ah SAC ralhrang rual nih ni fatein mipi harnak/hnahnawhnak an pek hna.

Myanmar ram pumpi huap in khuachung kapnak cu June thla hramthok in SAC ralhrang le Shwebo pengkulh mipi aiawhtu PDF karlak kahnak a hun um.

2003 kum Daw Aung San Suh Kyi khualtlawng lio ah a motor cu Shwebo pengkulh Dibeyin peng ah Ralkap hruaimi misual rual hna nih harnak an rak pek bal cang. Culio ah, khuate pakul (20) hrawng ah mipi thong tampi khua chuaktak in an rak tli cu vawlei cung thawngpang tiang ah a rak thang.

June 8 ah Dibeyin peng Yinkhua te phungki sianginn ah raldoh training nan pek hna tiin SAC ralhrang rual nih an rak lut hnawh i an rak kah hna. Mipi he kahdohnak cu a um hnu ah July 2 Dibeyin peng Setpia khua ah mipi PDF he kahdohnak ruangah mipi 30 hlei cu SAC nih an rak thah hna.

Mah kahdohnak hnu ah Shwebo pengkulh fonh in PDF le Sagaing ramthen chung in pengkulh fonh PDF kip he pehtlai nak an hun ngei kho.
June thla le July thla chung ah Sagaing ramthen ah kahdohnak 198 a um i, ralhrang lei minung 309 an thi tiah NUG Defense Minister nih a chim.

Shwebo pengkulh hi Myanmar lei a laifang le Kachin ramthen umnak lam a si caah SAC ralhrang nih Myanmar chaklei (Northern) ralhmun ralhruang (defense) lak khawhnak ding hmun rem ngai a si.

KIA lei in an hun zuang tik ah mah Shwebo pengkulh nih a kham. Cucaah ralhrang uk mi pengkulh si peng ding hi ralhrang nih an buai pi ngai.

Yinmarpin Pengkulh Kahdohnak

Chin ram kalnak lam pi a um mi Chindwe tiva hnu lei khua Yinmarpin pengkulh chung um Yinmarpin peng, Salinkyi peng, Pale peng, le Kani peng ah nite in kapdohnak a um ruang ah khua mi tong tampi ralzaam in an um. Pengkulh chung in raldoh training a cawnmi PDF pasal tha tampi an um ve cang.

Chin ram thlanglei Mindat peng kalnak lam awr ah Yinmarpin-Pale lam, Chin ram chaklei pengkulh hna le Kalaymyo pengkulh lam- Minkin peng, Kalaywa peng, le Kalaywa-Yakyi lam ah kahdohnak a um peng rih.

Cucaah Ralhrang nih Yinmarpin pengkulh chung lam hunhimnak an lak khawh ah cun Chin ram le Kalaymyo lei ral dohnak ah a tha lai ti an ruat ruang ah ralhrang nih fakpi in an nor peng nak a si. A bik in Pungtaung/Pungngia tlang hi mipi PDF le hmunhma lak nak ah a rem ngai mi a si caah SAC ralhrang lei nih an runven peng. Mah tlangthluang ah PDF lei nih ralhrang tamnawn te an thah cang hna.

Rakhiang ramthen, Chin ramthen, Kachin ramthen, tlangcung in rawn lei an run nam hna sehlaw Chindwin Rawn ummi PDF hna he fonh in Sagaing ramthen in Mandalay ram tiang fawi tuk in an lak kho lai.

Atu ah cun Yinmarpin pengkulh khuate kip ah SAC nih Chindwin tiva le Ayeyarwaddy tiva in tilawng le keralkap nih an hun nam peng hna caah Lai methal in raldoh cu a fawi lo. NUG lei hriamnam pek ding mi an hngak ko.

*****Kalay Valley Kahdohnak kan pehthan te lai*****

Na ruahning rak langhter ve.. (Leave a comment)

%d bloggers like this: