2015 Chinram Hartong Bawmhmi Thilri Cozah Buk Chiahmi A Rawk Caah Motor 6 in Hakha Khua lengah Hlonh
2015 Hartong Thil Hlonhmi Second Hand pawl an i lak lio
Salai Josephbawi| TCP Hakha| September 26| 2015 Chin ramkulh Khualipi Hakha hartongmi le ruahlopi in a chuak kho mi Chin ramkulh harton bawmchannak caah tiin Chin ramkulh nih Hakha Town Hall pawng buk chiah mi thilri Facang, Chiti, dinti, pe, nga/caw kuang, khoksuai, lakphet, ngapih, secondhand thilpuan le eisupsap pawl cu ni a luan caah Hakha Town Hall pawng chiahmi thilri cu September 22, 2018 ah Sipin Motor pa 6 in Ruavazung thlan pawng Sipin hnawmthleknak ah an va hlonh tiah thawngtheih a si.
Hi Hartongmi caah bawmchanmi thilri le facang tawlrelnak kong he pehtlai in Chin ramkulh Cozah cakhenh September 14, 2018 ah Chairman- Social Minister (Vuanci Pau Lun Min Thang), chungtel ah Ramkulh palek bawi, Ramkulh uktu bawizik, Ramkulh eidin lei bawizik, Ramkulh Eidin chekfeltu bawizik, ramkulh tlunkal bawizik, Hakha pengkomh uktu, Hakha sipin bawi le Ramkomh Hartong zohkhenhtawlreltu hna in committee ser a si i Committee rian cu Hakha Zungkipfonh um Facang tun( 2488) le Townhall pawng Godown chiahmi thilri a chia mi le a tha mi thleidan in a chiami hlonh in a thami a herhnak zawn ah hman ding ti a si.
2015 kum in 2018 kum tiang Chin ramkulh Kokek harton ruangah eidin awk ngeilo kan tampi ko lio ah hi ti bantuk in eidin le thilpuan an hlonh mi kongah a hmutu innpawng hna nih an lungtlinlonak le Chin ramkulh Cozah santlaih lonak kong inndong donghnih nih The Chinland Post ah an chim.
Mi har chanchuahtu zung Ramkulh bawi tuanvo ngei U Kyaw Soe nih “September 6, 2018 ah Chin ramkulh zungkip meeting kan ngei. Cu ahcun hman awk tha lomi hlonh ding le hman awk tha mi cazin ningcang tein chiah ding tiah meeting biachahnak kan tuah. Cucaah Cozah le zungkip hnatlaknak in kan rak tuahmi a si” tiah The Chinland Post ah a chim.
A caan lio te ah Mipi sin phakter lo in nan hlonh tiah The Chinland Post biahalnak ah “Hi har chanchuahtu zung hi 2015 kum ah U Ling Htut, 2016 ah Pu Chum Hre (Tleicia), 2017 ah U Myint Aung (Pension) hna an si. Cu lio ah kanmah zung nih dengteo tlaih um lo in Chin ramkulh Cozah nih a tawlrel mi a si. Cu caah tutan kong zongah kan mah zung hnatlaknak silo in Cozah lei committee sermi in tawlrelmi a si” tiah Hartong Chanchuah zung riantuantu pakhat nih The Chinland Post ah a chim.
Hman awk tha lo tiah hlonhmi thilri tampi lak ah Second hand thilpuan le eidin tlawmpal cu Hakha Palek chungkhar sin ah phawtzamhnak an ngei, cu lak ah Facang tun cheu 3 cheukhat, pe cheuthum cheukhat, coffee(1), datsa (2) le thilpuan zun (3) fai aa tel tiah palek he a naihniammi nih an chim nain Palek lei nih Hlonh awk thilthiar lawng kan bawmh hna. Palek caah zeihmanh kan la lo tiah rianngeitu nih The Chinland Post ah an chim.
Cu kong he pahtlai in Chin Ramkulh Social Minister Pau Lun Min Thang nih “ 2015 in nihin ni tiang Chin Ramkulh harsatnak kan ton te tikah bawmte dingin kan chiahmi thilri pawl an si. Harnak ngaingai kan ton lo tikah Cozah nawllo in kan hmang lo i a tu bantuk in ni a luanhnak hi a si. Cu a luan cangmi cu minung ei awk a that lo tik caah ei awk tha le thalo kha ningcang tein kan then i eidin awk a thami cu Chin ramkulh bianabia ah paletwa ralzam hna zongah hlut kho dingin kan tawlrel hi a si” tiah The Chinland Post ah a chim.
Hi kong he pehtlai in Hakha Rescue Committee(HRC) Secretary Rev. Tluang Ceu nih “ Cozah sin ah sing 8000 a lut tiah kan theih. Cucu Sing 2000 fai an hman kan theih tikah Thilri he tangka he a tan rih ko tung. Zeitin dah kan tawlrel lai tiah Social Minister voihnih kan len tikah Cozah lei nih sing 6000 bank ah kan chiah rih ko, thilri zong a herhning in kan tawlrel lai an ti I cucu an tuah a si lai. Harton lio ahhin Cozah sin a lutmi cu Cozah nih an tawlrel, HRC a lutmi cu HRC nih rak tawlrel a si. HRC sin ah a lutmi thilri vialte cu hman a tha sual lai lo kan ti I Hakha lawng silo in Khuate tiang hmanh kan rak pek pah hna. Atu Cozah sin a ummi cu Khuate lam a min, a rawk tinak lawng ah pei Vuanci nih thil tlawmpal an I phorh le an pek ko hna cu” tiah The Chinland Post ah a chim.
Hi kong he pehtlai in Food & Drug Administration (FDA) zung in Salai Kee Hung nih ” Cozah rian pek nak in Thil cu kan check i eidin thilri paohpaoh cu a nicaan a luan cang caah kan hlonh dih ko” tiah The Chinland Post ah a chim.
“ 2015 Hakha harton lio thil a si tikah tangka a tangmi zong Hakha hmunthar sersiamnak caah hal in a herhning tawlrel kan timh” tiah a biapeh ah a chim.
Hi hlonhnak ah hartong chanchuahtu zung (kese) lei le Hakha pelek ibawm in Thil hlonh a si i Thilhlonhmi second hand lak duh ah a bawmh mi hi September 22,23, 24 tiang Hakha town hall siseh, Hakha Sipin thurhlonhnak ah a tlawmbik minung 50 fai cu The Chinland Post in hmuh a si. Motor 6 kan hlonh cang tiah Cozah hartong chanchuah zung an pu nih The Chinland Post nih a chim. Hartong thilri an chiahmi i cheuhnih cheukhat lawng an hlonh rih tiah theih a si. (Hmanthlak: Townhall Second an thim lio )
About The Author
