2018-2019 Kum Ah Rampi Cozah Nih Chin Ramkulh A Bawmhmi A Tam Bik
Salai Elvis| 2019 March 14| 2018-2019 tangka kum ah Kawlram chung ramthen le ramkulh 14 ah rampi (pyidaungsuh) cozah nih Chin ramkulh bawmhnak a pekmi (Grant Transfer) a tam bik tiah Chin ramkulh Citizen’s Budget fianternak cazin ah an langhter.
Ramthen le ramkulh 14 chung 2018-2019 kum ah rampi cozah nih bawmhnak a pekmi hna cu Chin ramkulh, Kaya, Tanintharyi, Kachin, Karen, Rakhine, Mon, Magwe, Shan, Sagaing, Pago, Irrawaddy, Mandalay le Yangon an si, a tam bik bawmhmi Chin ram le a tlawmbik ah Yangon ramthen a si.
Hi chungah rampi cozah nih 2018-2019 kum Chin ramkulh bawmhnak pekmi (Grant Transfer) dihlak, Ks.137 billion renglo (94.6%) a si. 2016-2017 kum ah 132 Billion, 2017-2018 kum ah 139 Billion, 2018 kum Mini Budget ah 65 Billion tiin kum chiar te rampi bawmhnak pek ning a si.
2018-2019 kum i rampi cozah nih 137 Billion a bawmhmi cu Chin ramkulh milu Lah-wa-ka cazin ningin tuak tikah hi kum ah minung pakhat nih Ks.269,611 hrawng kan ngah kho tinak a si.
Hi bawmhnak kongah rampi cozah nih tahfung phun 6 an chiahmi a um. 1. Minung zatuak in a zok, 2. A sifak bik timi cuaithlainak, 3. Vawlei hmunhma bitkauh ning le tangka luhchuahnak kong, 4. Minung pakhat nih tangka hmuhnak (GDP), 5. Khuapi um milu sining le 6. Minung pakhat nih ngunkhuai peknak le hmuhnak tiin tah le riakhiah hnu ah rampi cozah nih Grant Transfer a pek hi a si.
A fawinak cun a sifak bik ram timi le thanchonak kongah a hnu bik timi cu tam deuh in an bawmh hna tiah ramkulh budget kongkau tawlreltu Director U Thein Win nih fianternak a tuah.
About The Author
