2018 Kum Caah Nobel Peace Prize Cu Mukwege Le Murad An Pek Hna
City Hunter |2018 Tho 6| Tukum, 2018 caah Nobel Peace Prize cu Kongo Democratic Republic ram in tlaihhrem a tongmi hna pawl thlopbul zohkhenhnak a tuahtu siibawi Dr. Denis Mukwege le Iraq ram ah IS ralhrang phu hna sex lei sal in a luatmi nuhrin covo lei kongkau a cawlcangtu Nadia Murad hi hmunkhatte ah an pekti hna.
Nobel Peace Prize thimnak video clip tawite
Nadia Murad (kum 25) hi Yazidi miphun a si. 2014 kum ah IS ralhrang phu nih an tlaih i a zaam manh hlan thlathum chung tlaihhrem a tong i sex lei sal ah an tlaihmi a si. Nadia Murad hi IS nih an tlaih i an duh tik paoh ah an ihpi mi le a hnu ah Sex sal ah an zuar i a luat khomi a si. Ralpi chung ah tlaihhrem hi hriamnam pakhat bantuk in an hmanmi dohdalhnak lei a cawlcanghmi ruang ah atu bantuk in Nobel Peace Prize an pek hi a si.
Dr. Denis cu Kongo le Africa i raltuknak ah tlaihhrem a tongmi hna le khualak tlaihhrem a tongmi nu hna a thlawpbul hna, an dam tiang a zohkhenhtu siibawi, amah zong voi tampi thah an zalh tawnmi a si. Hi rian hi kum 20 chung a tuahtuan cang. Dr. Denis hi kum nga a peh in Nobel Peace Prize pek ding ah min an tar cangmi a si, tukum ahcun Nadia Murad he an van pekti taktak cang hna.
Ral lak le buainak ah sex lei kongkau tlaihhremnak hna hi hriamnam pakhat bantuk in an hmanmi pawl donghternak ding i zuamnak caah laksawng pek ding in kan thimmi hna hi a si tiah Norway ram Nobel Peace Prize pekding thimtu committee nih cathanh ah an langhter chih. Nobel Prize thimtu committee haotu nih atu ah kan thimmi hna pahnih hi sualnak a tuahtu hna dohkalhnak caah a biapi tukmi an si tiah a chim.
Ral lak le buainak ah sex lei kongkau tlaihhremnak donghternak caah hmaisuang in aa zuammi Mukwege hi ramchung ah siseh, ramleng ah siseh a minthang ngaimi a si. Tlukruannak timi hi mikip tuanvo a si timi hrambunh le dirhmun fek aa tlaihtu pakhat zong a si.
Ral thawh ruang ah hriam pakhat bantuk in tlaihmi Murad cu tlaihhremnak tonmi ningzah le tih tuk ruang i nu pawl hmurka a phittu zatlang le pawngkam rikhiahmi pawl a cohlang lotu pakhat a si. Cu bantuk in amah pumpak hrimhrim zong nih a intuarmi pawl le midang temhtuarnak pawl a chimphuang ngamtu khuaruahhar pakhat zong a si tiah Nobel Peace Prize committee hna cathanh ah aa tel chih.
Dollar 1.1 nuai a co dingmi Medicine lei Noble prize, Physics lei Nobel Prize, Chemistry lei Nobel Prize zong tu zarh chung ah an thanhchuah lai i Economic Science lei kongkau Nobel prize tu cu hmaizarh nikhat ni ah an thanh te lai.
Caholh lei Nobel Prize tu cu laksawng pekding thimtu phu ah sex lei kongkau buainak a um ruang ah tukum ah an pe lai lo.
2018 kum caah Nobel Prize co khotu ding ah min a chuakmi cazin zapi hi pumpak le mibu he 331 an si.
Ref: BBC, RFA Burmese
About The Author
