2018 Kum Chung Myanmar Ram Ah Uico Seh A Tuarmi 190000 Renglo An Si

0

TCP-Hakha| 2019 April 24|Myanmar ram ah uico seh a tuarmi an karh deuhdeuh i 2018 kumkhat chung ah uico seh a tuarmi zapi 190000 renglo an si tiah Ngandamnak minister nih a thanh.

Cu ruang ah uico seh a tuarmi mizaw pawl ningcangte in thlopbul khawhnak ding ah uico seh a tuarmi mizaw thlopbulnak center (Dog Bite Centre) an hun lai tiah theih a si. Hi center cu Yangon ramthen lawng ah si lo in Mandalay zong ah a rannak in an hun lai i ramthen le ramkulh dang zong ah kan hun chap te lai. Hi center hun khawhnak ding ah Myanmar ram sii-inn vialte hlathlainak tuah in a herhmi hmun, riantuantu thazaang, sii le seh thilri, uico hrut sehmi damnak sii le runvennak sii chiahnak ding zong timhcia in chiah le riantuantu hna zong training peknak kan tuah lai tiah Ngandamnak lei ramkomh minister Dr. Myint Htwe nih April 22 ah a chim.

Cu pin ah uico hrut sehmi damhnak le runvennak sii cu thihri chung i chunh (intramuscular) si ti lo in vawleicung ngandamnak bu-WHO nih hngalhpimi he a that aa tlukmi sii-ai le a man tlawmdeuh lawng dih ding in takvun chung ah chunh(intradermal) an si cang lai tiah theih a si.

Ministry zung nih kumtin hoih in uico hrut damhnak sii le thlopbulnak thilri cawknak caah 2018-19 kum budget ah ks. 5.4 billion an hman. Ref: Duwun

About The Author

Na ruahning rak langhter ve.. (Leave a comment)

%d bloggers like this: