2018 Miss Thantlang Mai Teresa Sui Ngun Tling He Biaruahnak
Salai Elvis| 2018 Tho 25| Avoi khatnak tuahmi 2018 Miss Thantlang Winner le People Choice a ngahtu Mai Teresa Sui Ngun Tling cu TCP nih a tubantuk in caan tawite chung biaruahnak kan tuah.
TCP: A hmasa bik ah 2018 Miss Thantlang le People Choice na ngahmi cungah na Feeling?
Miss: Teinak cotu ka si te lai timi zong kaa zum lo, a tubantuk in teinak ka hmuh tikah ka lawmtuk. Mah zuamnak chungah a ka luhtertu kan sangchung hruaitu hna le Miss kongah tawlreltu upa pumpak pakhat cio cungah kaa lawm tuk ti chim ka duh.
TCP: Miss hi zeiruang bik te ah khin dah ka hmuh tiah na ruah?
Miss: Keimah nih ka hmuhning ah cun umtu hoiher/mirh (smiling face) ah hin a si rua tiin ka hmuh. A ruang cu an ka chimh tawn. Miss zuamnak chung ah hin na mirh peng lai an ka ti tawn caah mah ruang te ahcun ka hmuh tiah kaa ruah.
TCP: Miss naa zuam lai ah zeitluk in dah timhtuahnak na rak ngeih?
Miss: Hi kongah timhtuahnak ka ngei manh lo. Mandalay in Thantlang ka tlun nihnih lawng a si rih. Upate nih Lungtial sang ai-awh in Miss aa zuam ding an um lo caah nangmah naa zuam a hau an ka ti i ka ngamh lo pin ah Thantlang khuachung ah mi theih mi zong ka ngei lo tiin ka al hna. Asinain na ngah lo zongah a poi lo, i zuam ko tiah an ka ti peng. Cun ka nu le zong nih i zuam ko tiin tha an ka pek than caah Miss zuamnak chungah ka luhnak cu a si.
TCP: Top 5 bia halnak chungah zeibantuk dah bia an in hal i na leh ning hna kongah naa lunghmuh maw?
Miss: Keimah an ka halmi cu Miss pakhat hei si law zeitindah kan um awk a si tiah na ruah? timi a si i 10 second chungah leh ding ti a si fawn caah ka lungchungchuak paoh ka chim ko i ka chim manh zong kaa thei lo. Ka leh ning hna cu kaa lunghmuih lem lo.
TCP: Atu lio na tuahmi le na riantuanmi?
Miss: Mandalay Degree Collage ah English Major in a kum khatnak ka kai lio a si.
TCP: Careltu sin ah ah biacah na duh mi?
Miss: People Choice caah Online in vote a ka pemi an dihlak cung le Winner tiang a ka phaktertu tawlreltu hna cungah kaa lawm. Cun a si kho lomi ti cu a um lo i mah le mah zumhngamhnak zong ngeih ahcun zeithil paoh a si kho dih ko lai. Hi pin lei mino cawlcanghnak zongah ka si khawh chungin kaa teltum cang lai.
Miss Teresa Sui Ngun Tling (kum 18) cu Hnaring khuami Pu Thla Mang le Pi Ngun Ding hna i an fa nu hniangbik a si i unau pa 4 le nu 3, an zapi unau pasarih chuak an si. A tu lio ah Thantlang khua sangthen No.3 Lungtial sang ah a ummi an si. +++
About The Author
