2019 Hakha Tho Ni Ah Kum Dang Tuah Bal Lomi Thil Phunthum An Tuah Lai

Salai CungCung|2019 September 9| Hakha Ca le Nunphung bu tawlelnak in Tho ni cu October 19, 2019 Con Bik Hall an tuah lai. Tu kum Tho ni ah hin kum dang tuah bal lomi Lai Paih, Lai nunphung lam le miphung pa 9 thilthuam hmuhsaknak an tuah lai tiah kan theih.

“Tu kum Tho Puai hi kum dang ah kan tuah bal lomi  Lai Paih, Lai nunphung lam, Kan laimi, Miphun 9 i thilthuam hmuhsaknak tibantuk hi um kho seh tiin timh tuahnak kan ngei i cu pawl program a tlai mi sub-committee nih tuanvo lak piak ding in kan chimh hna. Hi Tho ni ah hin mah le Department cio in kan chiah hna, hlasak lei, lam lei ti bantuk a dangdang in tuanvo kan pek cio hna” tiah Ca le nunphung bu Assistant Secretary Salai Van Cin Thang nih The Chinland Post ah a chim.

“A caan hi October 19 zing suimilam 10 in zaan lei 6 tiang kan ti nain Paih hi zei tik a dih lai kan fiang rih lo caah chim awk a tha rih lo. Tho ni Paih zuamnak ah hin laksawng pawl cu, a tu kan mah committee nih ceih chung mi ah cun Pakhatnak Sing 5 le trophy, Pahnihnak Sing 3 le tropy a si lai. A sinain hi kar lak ah Paih  committee sin ah bawmhnak tete a um pahsual ahcun laksawng zong a tam deuh kho. Hi Paih ah hin zatlang paih, zuamcawh Paih tibantuk cu an mah Paih committee lei nih an ceih te lai i cu hnu lawng ah Paih lei kongkau cu tlamtling in  a fiang te lai.  Chin ramkulh minister sawmnak zong an mah program Committee meeting tuah hnu lawng ah a fiang te lai” tiah a chim chap.

Hi Tho ni cu kumkhat voikhat tuah ton mi a si ko nain tukum ahcun kumdang tuah bal lomi thilphung thum an chap hi a si. Hi Tho ni ah hin Sub-Committee tampi an um i kum dang nak in sunglawi deuh in timhtuahnak an ngei tiah kan theih.+++

 

Na ruahning rak langhter ve.. (Leave a comment)

%d bloggers like this: