2019 Kum Tagyan Ah Myanmar Rammi 288 An Thi I 1000 Renglo Hliamhma An Tuar

TCP-Hakha| 2019 April 18| 2019 kum Kawl biaknak ti toih puai (Tagyan) ah Myanmar ram hmunkip in minung 288 an thi i 1000 renglo hliamhma an tuar tiah cozah thawngthanhca nih a thanh.

Atu a thimi cazin langhtermi hi Tagyan aa thawk ni in a dongh tiang chungte lawng ah a cangmi a si. Hi chung ah ti i toihnak, rithaisii eidin le i nuamh tuknak, daithlang in motor monghnak, i siknak le buainak pawl in a chuakmi lawngte an si.

Tagyan he dengteo in aa pehtlaimi a thimi hna cu; mi thahnak case voi 7 in minung 7 an thi i 4 an i hliam. Motor khawndennak case voi 21 in minung 8 an thi i 69 an i hliam, i sik, i velhnak case voi 36 in minung 57 an i hliam, firtlei case voi 2, ti tlak case voi 14 in minung 14 an thi tiah theih a si.

Atu langhtermi thil cang hi ramthen le ramkulh 11 lawng ah a si, a thimi tambiknak hmun cu Sagaing ramthen, Yangon ramthen le Naypyidaw ah an si.

Hi pin ah Tagyan he aa pehtlai lomi a dangte in ram pumpi ah ramthen kip in i thahnak case voi 30 in minung 31 an thi i 3 an i hliam, motor pahnak case voi 339 in minung 115 an thi i 728 an i hliam, i sik velhnak case vooi 105 in minung 144 an i hliam, ti tlaknak case telh in thihlohnak case voi 110 in minung 113 an thi, firtleinak case voi 36 a cang tiah cozah nih an thanh.

Tagyan chung ah ral a ser khomi fung, nam, li, cikcin, thirhri, cerep, zuu le beer thol, rithaisii tibantuk tampi chuh le tlaih an si i cu he pehtlai in minung 2797 zong tlaih chih an si. Sualnak a ngeitu paoh upadi he aa tlak in dantat an si lai.

A luancia kum 2018 Tagyan chung ah motor khawndennak case 317, aa hliammi 106 le a thimi 642 an si tiah Vice President Henry Van Thio nih April 8, Naypyidaw ah tonpumhnak ah a chim.
Ref: DVB Burmese

Leave a Commnet

%d bloggers like this: