2019 Senthang Person of the Year Ah Salai Sang Hnin Lian An Thim

0

The Chinland Post, 2019 July 30| Senthang Family in North America tiah rak theihmi Chin Senthang Organization-United States of America (CSO-USA) nih 2019 kum Senthang Person of the Year ah Salai Sang Hnin Lian an thim.

CSO-USA hruaitu upa nih minung pathum thimnak an chuahpi hna hnu ah Online in mizapi thimnak an tuah. Online ah min tarlanghmi pathum chung ah Salai Sang Hnin Lian nih zatuak 72.2% a hmuh caah anmah cu 2019 Senthang Person of The Year ah thim a si tiah Global Senthang (Official Group) an thanh.

Hi laksawng peknak kong CSO-USA nih Global Senthang Biaruahnak ah tuanvo ngeitu upa Van B Lian nih, “a ralaimi August 9-11 ah tuah dingmi a voi 8 nak CSO-USA Conference 2019, Chicago ah tuah dingmi ah pek a si te lai” tial a thanh.

CSO-USA nih kum hnih dan tuahmi ‘Senthang Person of the Year’ thimnak ah Minthatnak laksawng le Kyat 500,000 an pek lai tiah theih a si.

A luan cia kum hnih lio, 2017 Senthang Person of the Year cu Hakha Baptist Association (HBA) ah General Secretary, Chin Baptist Churches USA (CBCUSA) ah Vice-president a rak tuanmi le tulio Texas Chin Baptist Church ah Senior Pastor tuan liomi Rev. Tial Lian a si.

Tutan Senthang Person of the Year petu, Chin Senthang Organization USA (CSOUSA) cu 2007 ah Senthang Family of North America (SFNA) tiah Jacksonville, Florida State, USA ah rak dirh a si tiah kan theih.

Salai Sang Hnin Lian cu tukum 2019 March thla lio zong CCN Channel nih a voikhat nak an tuahmi Awards an pekmi chung in “CCN Award” a rak pek cangmi a si.

Zei ruang ah dah Senthang Person of the Year 2019 an pek timi cu CSO-USA nih an langhter lo nain, Salai Sang Hnin Lian cu a tulio Malaysia, India ram hna ah a ummi Chin ralzaam hna kong ah biatakte in a cawlcangmi a si. 2018 kum chung ah a riantuannak pakhat simi CHRO aiawh in vawleicung khuazakip ah kal in cozah upa le UN upa hna he zong hmaitonh in bia a ruah tawntu zong a si.

Atu lio a riantuannak Chin Human Rights Organization (CHRO) ah Program Director for Human Rights Education & Religious Freedom a si i cu he pehtlai in Chin Christian University (CCU) ah ‘Nuhrin Covo le UN Riantuan Ning’ zong ca a chim cuahmahmi a si.

Cun, zaanghleicawi in a tulio ah Fidi Foundation (The Chinland Post) ah Program/Managing Director zong a si chih fawn. Amah hi, Chin miphun kong ah capar Laica in siseh, Mirangca in tampi a tialmi zong a si.

Salai Sang Hnin Lian cu Kalay University in B.Sc., a dih hnu ah, Delhi University (India) in Political Science, Lucerne University (Switzerland) in Human Rights Implementation le Mahidol University (Thailand) in M.A., Human Rights a dihmi a si. +++

About The Author

Na ruahning rak langhter ve.. (Leave a comment)

%d bloggers like this: