2020 Akum 72nk Chin Miphun Ni Cu Ramkulh Cozah Nih Thantlang Khua Ah Tuah An Timh
2019 Thantlang Chin Phunpi Ni An Tuah Lio
Salai Elvis|2019 October 3| — 2020 Febuary 20 a kum 72nak Chin Miphun Ni cu Chin ramkulh cozah nih khuapi khua khat hnu, khua khat ah thial in a tuah tawn mi cu Thantlang khua ah a tubantuk in tuah dingin timhtuahnak an ngeih hi a si.
2020 kum Chin Miphun Ni cu ramkulh cozah nih Paletwa ah tuah i Kaladann hlei zong hunnak tuah pah dingin timhtuahnak a ngeih mi cu AA hriamtlai hna ruangah le pawngkam a daih lo caah a tubantuk in an let hi a si.
“Paletwa tuah dingin timhtuah a rak si ko, nain, AA hriamtlai ruangah pawngkam a him lo caah le puai tuahnak kong zong a tlam tlin deuh lai lo caah Thantlang lei ah hin i tuah kho seh ti saduh thahnak ngeih a si. Cu zongcu phungning in biakhiah nak tuah a si rih lo. Cucaah khi ni ah kum dang tawn bang ramkomh khuallian zong sawm an site ko lai.” tiah ramkulh cozah chimphuannak nawl ngeitu Vuanci U Soe Htet nih TCP ah a chim.
Atubantuk in ramkulh cozah nih khuapi pakhat hnu, pakhat ah thial in ramkulh huap in Chin Miphun Ni a tuah tawn mi cu Falam, Mindat, Hakha hna ah tuah a si cang i ramkomh lutlai khuallian a si mi President zong nih a tel pi tawn hna. Atubantuk in ramkulh cozah thithruainak in tuah mi ah Thantlang khua nih a tu hin a voikhatnak bik an tin co zong a si. Cucaah khi ni caan 2020 kum Chin Miphun ni ah Thantlang khua dinti lak mi zong hunnak tuahchih dingin ramkulh cozah nih timhtuahnak an ngei tiah kan theih.
About The Author
