2020 Chungah Myanmar National League(MNL) in Team(4) an i Ngol_Chinland FC Zong Harnak Tong

Salai David Van| TCP-Hakha| 2020 December 7| Myanmar National League (MNL) chungtel (13) a tangmi chungin 2020 chungah Team (4) an i ngol cang i Chinmi nih ngeihmi Chinland FC zong harnak an tong tiah thawng kan theih.

Hi kong he pehtlai in Chinland FC President le MNL ah EC chungtel a simi Rev. NC Thawng Tha Thang nih “Tukum Myanmar National League in Magwe FC, Southern FC, Chin United FC, Zwekapin United  FC _ Team pali hna hi Covid-19 pulrai harsat pek nak ruangah dir kho ti loin an kan ngol tak cang. Kan nih Chinland FC zong harsatnak tampi kan ngei ve. Asinain kan Chin mino tampi nih an pahrang a si ve mi in Miphun min an cawi khawhnak le Kawlram pumpululh chuihnak vawlei pi ah kan Chin min, kan Chin miphun sinak (Identity) a langh peng nak ding caah kan si khawh tawk in dir khawh kan I zuam rih, Chin miphun zong nih thlacamnak le thazang peknak in kan dirpi rih ko u” tiah TCP ah a chim.

Chinland FC hi Myanmar National League Team (II) a hnubik chuihmi ah mark thabik an si nain COVID-19 ruangah caan karlak lentecelhnak ngol chung a si i pehzulh in an icelh le celh lo 2021 January MNL EC meeting nih bia a chah lai tiah theih a si.

“Tukum MNL(II) ah Junior Lion he Mark sangcem kan si nain COVID-19 ruangah peh khawh kan si ti lo i Chinmi caah tukum ca i ka chunmang a simi Champion kan la kho ti lo” tiah Chinland FC President nih December 3, 2020 a Facebook Cahmai ah a langhter.

MNL chungtel hna harnak bik cu Lentecelhtu (players) hna thlahlawh le lentecelh caan tlunkalnak caah tambik a dih bik tiah theih a si.

Chinland FC cu 2006 ah Bishop CK No Chum nih a dirhmi a si i Chinmi aiawh in Kawlram Bawlung chuihnak nganbik Myanmar National League ah aa telmi a si. Lentecelhnak lawng silo in Paletwa ah ralzam le harsat in khua a sami hna caah bawmchannak an pek cuahmah lio a si tiah kan theih.

Na ruahning rak langhter ve.. (Leave a comment)

%d bloggers like this: