2020 Kum Ah Chin Cozah Uknak CNLD Kutchung Ah Kan Chiah Lai: Pu Zo Zam

kehlei in: Pu Zo Zam, Pu Ngai Sak le Pu No Than Kap

Salai Elvis|22 August 2019| Aralaimi 2020 kum thimnak ah cun Chin ramkulh Hluttaw le Chin cozah cu kan kutcung ah kan chiah lai i kan tei lai tiah August 22 Thantlang peng CNLD (Chin Nationalleague for Democracy) party zung hunnak ni ah a tubantuk in party Chairman Pu Zo Zam nih a chim hi a si.

“Chin ramkulh Hluttaw cu kan tei lai, Chin ramkulh cozah zong kan kutcung ah kan chiah lai i kan thithruai cang lai. Cucaah CNLD party chungah hin kan mifim thiam tampi zong kan ngei hna. Cucu a tu lawng in kan thok mi a si lo, a luancia 2010 kum in timhtuahnak le ruahnak kan rak ngeih cang mi a si. A tutan a ra kho mi hna hi teinak ding caah a bawmtu lawng kan si rih. Cun Chin miphun caah bochan mi lawngte an si fawn hna. Chin ramkulh uktu (Chief Minister), Hluttaw Speaker zong zeitik caan paoh ah a tuan kho ding mi lawng te kan si. Cun vuanci (Minister) zong zei tik caan paoh ah a tuan kho ding lawngte kan si. Atu lio cozah nakin tampi kan tuan khawh lai, USDP le NLD nak tampi in kan tuan khawh lai. Cucaah Mizapi he i bawm in kan tanrual ah cun teinak cu kan hmuh ko lai” tiah CNLD Party Chairman Pu Zom Zam nih mizapi he biaruahnak ah chim.

“Kan miphun nih kan duh lo mi paoh kha kan tei awk a si. Chin miphun nih kan duh lo mi le kan cohlan khawh lo mi thil paoh cu Chin Party pathum aa fonhmi CNLD nih kan nawr dih lai. Cucu a luancia kum 6 hrawng in timhtuahnak kan ngei cang. Cucaah Pathian thawng in tukum July 12 ni thok in Pary pathum kan i fonhnak hmat-pung-tin (Register) zong phungning le tlamtling tein pek kan si cang” tiah hi tonbiaruahnak hmun a chim hi a si.

Leave a Commnet

%d bloggers like this: