2020 Kum Thimnak Ah Hakha Nih Amyotha Hluttaw Hmun Hnih A Co Rih Ding A Fiang Lo

The Chinland Post Hakha| 2019 September 20| Aralaimi 2020 kum thimnak ah Hakha nih 2015 kum ah Amyotha Hluttaw hmunhma pahnih a ngah bantuk in 2020 kum ah a ngah lai a fiang rih lo tiah Chin ramkulh thimnak zung in thawng kan theih.

“Atu i thimnak zung nih cazin kan lakning ahcun Hakha nakin Matupi le Falam an tam deuh rih. Thimnak zung nih cazin kan lakmi in thimfung cazin fehter a si lo. Uknak zung le Lawakah zung nih cazin an chek dih hnu ah Lawakah nih a fehter mi ning in a si  lai. Atu ning cun Hakha nih Amyotha  hmun hnih a co lai ti chim awk a har rih” tiah thimnak zung in chungquan nih The Chinland Post ah a chim.

Aluanciami 2010 thimnak ah Falam nih Amyotha Hluttaw hmun hnih a ngah i, 2015 thimnak ah Falam le Matupi lonh in Lawahka chuahpi mi cazin ning in Hakha a tam deuh caah Hakha nih 2015 thimnak ah Amyotha Hluttaw hmun nih a ngah hi a si.

Asinain 2020 thimnak zong ah Hakha nih Amyotha Hluttaw hmun hnih ngahding hi aa naih bik ko tiah thimnak zung in U Lynn Kyaw nih a fianter.

“Thimnak zung nih cazin kan lakmi nih lai a rel lo. Lawakah nih lai a rel. Kan zung nih kan chuahpimi cazin kha Lawakah nih zohfelnak a ngei. Laimi tampi cu hmatpungtin an i tuah lo. Inntaungsuh cazin zong an ngei lo. Cu an ngeih lo ahcun thimfung thlak khawh a si lo. Kanmah nih cun pengkip cio ummi minung min le kum tlingmi cazin paoh kan lak. A caan ah kan lakmi cazin hna kha chikkhat sianginn kaimi, rian rak quanmi le mah le hmun ah a kirmi an um. Cu tikah lawakah nih a dikthlir in cazin a chuah tikah, anmah peng le tlang ah a um takmi cazin hi aa dang qheo. 2020 thimnak zong ahhin Lawakah cazin ning cun Hakha ah tam bik deuh a si,” tiah U Lynn Kyaw nih a chim chap.

Kawlram pumpi huap in ramkulh le ramthen pakhat cio nih Amyotha Hluttaw palai 12 cio thlah a si i Chin ramkulh in peng kua a ummi chung ah minung tambik nak peng kha hmunhma pahnih pek an si. Paletwa, Tedim le Hakha cu 2015 ah minung tambik an umnak caah Amyotha Hluttaw hmun hnih cio an ngahnak a si.

Na ruahning rak langhter ve.. (Leave a comment)

%d bloggers like this: