2023 Cacawn Kum Kalaymyo Ah Sianginn A Kai Dingmi 24,926 Hlei An Phan
Salai Mangpau | June 2, 2023 — Sagaing ramthen, Kalaymyo ah June 1 thawk in SAC nih Basic High School (Mucu in Grade 1-12 tiang) sianginn a on ṭhan i a kai mi siangakchia 24,926 leng an um tiah peng fim cawnnak zung (Township Education Officer) sin in theih a si.
Kalaymyo Education Office zung nih, “Primary Siangngakchia – 13043, Middle Siangngakchia -4299, High School Siangngakchia 1220 an si cang. June 1 sianginn on ni ah sianginn a kai mi an si i, mah hnu lei sianginn kai ding mi an hun i chap te lai tiah an thanh.”
2023-2024 cacawn kum Kalaymyo chung ah Cozah sianginn 57, Bahkah Sianginn (Phungki nih dirhmi sianginn-7, Private sianginn – 18 an on tiah theih a si.
Siangin on ni June 1 tiang ah Siangngakchia 24926 an si cang tiah Kalaymyo Fimcawnnak Zung sin in theih a si.
Tutan cacawn kum hi 2019-2020 Covid-19 pulrai a si hnu le 2021 kum ralhrang ralkap nih hramhram in uknak lak a si hnu kum 3 chung Kalaymyo ah, SAC kuttang ah sianginn an awn khawh mi a tam bik kum le siangngakchia a kai mi an tam bik kum a si tiah theih a si.
Ramkhel buainak ruang ah fale hna sianginn an kai khawh lo nak hi kum 3 leng a rau cang i ngakchia hna an hmailei ca ruah ah lungretheih a si caah SAC kuttang ah kan duh lo bu in sianginn kan apnak hna hi a si i a bik in Kalaymyo peng chungah SAC le mipi hriamtlai hna kahdohnak a um caah khuate tam deuh cu khua chuaktak a si i, a tamdeuh cu Kalamyo khuachung ah ralzaam in an um hna. Hi ralzaam fale khuachung ummi fale an si ruangah khuachung sianginn a ap mi an tam khunnak a si.
Tukum hi sianginn a ap mi an tam. A bik cu fale sianginn an kai ti lo nak hi kum 3 a si cang SAC kuttang ah sianginn kaiter an duh hna lo, nain Kalaymyo peng chung ahcun NUG nih a dirhmi sianginn zong a um lo, Cozah sianginn ah le sianginn kaiter an duh tuk lo mi an tam.
Khuachung um private sianginn le Bahkhah (phungki sianginn) ah sianginn kai aa tim mi an tam. Mah sianginn pawl zong SAC kuttang um Township Education Office nawl chuah ning tein sianginn kaiter a si.
“Mizapi kainak (cozah) sianginn an awn ko nain siangcachim an i ting zo lo. Cachimhnak lei a chanbau ngei. Cheukhat saya/mah CDM an tuah. Private sianginn ah cun cachimh thiammi an um. Sihmahsehlaw, sianginn apnak le cacawn man a fak ngai. Mi rethei chungkhar caah cun Private sianginn kai khawh a si lo” tiah Khuami pakhat sin in theih a si.
SAC ralkap uknak a lak hlan 2019 kum lio Kalaymyo peng chungah cozah sianginn dihlak 218 an um.
Mizapi kainak sianginn (cozah) High school – 13, High School (Affiliate-High school -12, Middle school- 7 le Tanghra tiang cawn khawnhmi dihlak 32 an si. Affiliate-Middle school hi 78, Mulun sianginn timi tangsarih tiang cawn kho mi hi 27, Primary sianginn hi 41, Affiliate-Primary hi 15 a rak um tiah theih a si. Cun, a dang tein Buddhist Sianginn (Bahkah) timi hi cozah he a pehtaimi sianginn ah 14 an um. Hi Buddhist pawl nih dirhmi sianginn alak in cacawn khawhmi (Pyin-Ngia-da Nah,) sianginn 52 an um. Cozah sianginn ah cacawn hau tilo mi Private High sianginn 11 an um le a dang cozah sianginn siangin ah cacawn a hau mi Private sianginn 82 an rak um. #
