2026 ASEAN Chair Ding Ah Myanmar Ralhrang Ṭuanter Ti Lo In Philippines Ṭuanter Ding Tiah Biachahnak An Tuah

Salai Mangpau | 2023 September 6 – 2026 kum caah ASEAN Chair ṭuan ding Myanmar ralhrang lutlai rual cu ṭuanter ti lo in Philippine nih ṭuanvo lak ding in 43 rd ASEAN Summit hruaitu hna nih September 3-5 tiang Indonesia ram Jakarta khua meeting tuahnak ah biachahnak an tuah.
Daw Aung Sang Su Kyi hruai mi mipi cozah cu SAC ralhrang nih hramhram in uknak a chuh hnu ah ralhrang lutlai rual cu America telh in nitlak lei ram nih Sipuazi phihkharnak Sanction an tuah hnu in ASEAN Chairman ṭuanvo tiang zong a sungh chap hi a si.
Indonesia ram, Jakarta khua ASEAN summit innkharkhumh meeting ah Philippine ram nih Myanmar ram aiawh ah 2026 kum ASEAN chairman ṭuanvo lak a si lai tiah Philippine President Ferdinand Marcos Jr. nih a chim.
Myanmar SAC ralhrang lutlai pawl ASEAN chairman tuanter a si lo nak cu Myanmar ah SAC ralhrang nih mipi thahnawmnak a tuah mi kong le America telh in ni tlaklei ram, Europe ram hna le ASEAN ram pehtlaihnak a rawk saul lai ti an phan ruang ah a si ko tiah ASEAN chung ramdang lei pehtlaihnak ah a ṭuan mi hna nih an chim tiah Channel News Asia- CNA nih a ṭial.
Photo / Channel News Asia