2026 World Cup Cu North America Ramthum I Bawm In An Don Lai

0

City Hunter| 2018 June 14| A ralaimi 2026 kum World Cup zuamnak cu North America a simi US, Mexico le Canada ram ah ramthum i bawm in an don lai. 2026 kum ahcun World Cup aa zuam dingmi pumpululh phu zapi hi phu 48 an si lai. Ni 34 renglo chung puai 80 an chuih te lai.

June 13, Russia ram Moscow Expocentre ah tuahmi FIFA congress meeting ah 2026 kum World Cup tuahnak hmun mee thlaknak an tuah. North America ramthum nih mee 134 le Morocco nih 65 lawng a ngah.

Morocco hi tutan he hin voi 5 tiang World Cup don ding aa zuam cang nain a ngah lo. UN nih Morocco hi nuhrin covo buarnak a tuah caah mee pek lo ding a si a ti caah a sungh lengmang nak hi a si. Tutan mee thlaknak an tuah hlan ah minute 15 chung veve biachimnak le thil sining fianhnak an ngeihter hmasa hna. North America ramthum nih World Cup in $11billion amiak kan hmuh lai tiah biakamnak an tuah i Morocco ram tu nih cun $ 5billion lawng in bia aa kam.

Phu 32 in World Cup zuamnak tuah tawnmi kha 2026 ahcun phu 48 in a hmasa bik zuamnak an tuah cang lai. Phu 48 in puai 80 an chuih dingmi cu Mexico ah puai 10, Canada ah puai 10, US ah puai 60 an chuih lai. A donghnak bik final tu cu American ram New Jersey ramkulh Metlife certual ah an tuah lai. American ram nih 1994 kum ah World Cup a rak don bal i Mexico ram nih 1970 kum le 1986 kum ah World Cup an rak don bal. Canada ram tu cu Women’s World Cup zuamnak lawng 2015 kum ah an rak don bal. 2022 kum World Cup cu Qatar ram ah an tuah lai.

Tukum 2018 World Cup cu Russia ram ah June 14-July 15 tiang an tuah lai. World Cup donnak ah a hmasa bik a chuih dingmi cu inntek Russia le Saudi Arabia (Group A) an si lai. An chuih caan hi Kawlram suimilam in 9:30pm ah a si lai.

World Cup A Dongtu Ram Le An Don Kum
1930 kum ah Uruguay
1934 kum ah Italy
1938 kum ah France
1942 le 1946 kum ah Vawleicung ralpi pahnihnak ruang ah an tuah kho lo
1950 kum ah Brazil
1954 kum ah Switzerland
1958 kum ah Sweden
1962 kum ah Chile
1966 kum ah England
1970 kum ah Mexico
1974 kum ah West Germany
1978 kum ah Argentina
1982 kum ah Spain
1986 kum ah Mexico
1990 kum ah Italy
1994 kum ah American
1998 kum ah France
2002 kum ah South Korea le Japan
2006 kum ah Germany
2010 kum ah South Africa
2014 kum ah Brazil
2018 kum ah Russia
2022 kum ah Qatar
2026 kum ah US, Mexico le Canada
Ref: BBC, Duwun

About The Author

Na ruahning rak langhter ve.. (Leave a comment)

%d bloggers like this: