AUSTRALIA LE AMERICA EPCHUNNAK
Pu Ram Khar| 2018 December 4| Chin miphun tampi kan umnak America ram le Australia ram hi an ram thatnak, chiatnak, an rumnak, an sifahnak, an i dannak, um a nuamh le nuamh lo an i dannak hi Chin miphun mi tampi nih Australia a tha deuh, a rum deuh, US a rum deuh, a tha deuh, um a nuam deuh tiah an chim theu mi cu a tawinak te in kan van zoh tuah lai.
(1). An ram bit kauh (Land Area)
America ram cu Square km 9. 8 million a kau i vawleicung ah ram kau bik 3nak a si. Australia ram cu Square km 7. 69 million a kau i vawleicung ram ngan ah 6nak a si.
(2). An Ram minung tlawmtam (population)
America ram minung dihlak hi Million 300 leng kai an si. Vawleicung minung tam ah 3nak a si. Square Kilometer 1 ah minung (33.21) an um. Australia ram minung dihlak Million 25 hrawng te lawng an si i, vawleicung ram minung tam ah 51nak lawng a si. Square kilometer (1) ah minung (3.1 ) lawng an um. Vawleicung minung chah pan (density) ah (6) nak a si . A tlawmbik hi Falkland Islands a si i, Square km 1 ah 0.3 lawng an um.
(3). An Ral Kap thazaang (Strength of Military)
American ralkap dihlak hi Sing 23 (2.3 million) renglo an si. Vawleicung ah ralkap milu tam ah 3nak si . Ral tuk ah a thawngbik (Super Power) a si. Ralkap caah phaisa a hmanmi hi 2017 ah US$ 590 billion a hman.
Australia ralkap an dihlak hi Singkhat hrawng te an si. Vawleicung ralkap thawn ah 21nak an si. Ralkap caah a hmanmi phaisa hi 2017 kum ah US$ 25.6 billion a hman.
(4). Technology lei ah (Technology)
American technology lei fimnak hi Australia ram nakin kum 20 (two decades) in hmaisuang ah a kal ti a si.
(5). An rumnak le an ngeihchiah chawva (GDP and Percapita)
America ram GDP (gross domestic product) hi, 2017 Kum ah US$ 19.39 trillion a si, vawleicung ah pakhatnak a si. Per Capita hi, US$ 60000 hrawng a si. Vawleicung ah 7nak a si.
Australia ram GDP hi US$ 1.32 trillion a si. Vawleicung ah 13nak an si. Per Capita ah hin US$ 45000 renglo an si i vawlei Cung ah (19)nak an si.
(6). Ram mi himnak le daihnak ah (Peace and security)
Global Peace Index nih 2018 Kum ah a thanhning cun America ram cu vawleicung ah himnak lei le daihnak lei ah 121nak lawng a si. Australia ram cu vawleicung ah himnak lei, daihnak lei in 13nak a si. American nakin himnak a um deuh tinak a si.
(7). Ram Mizapi zohkhenhnak (State welfare)
American nih an ram mi rian ngei lo, Nu le hngakchia, tar, mipumtlinglo, Pensen la cia mi, ngandamnak lei zohkhenhnak ah kumkhat ah phaisa a hmanmi cu 2018 phaisa kum ah US$ 1163 billion a hman.
Australia ram nih hin hi vialte zohkhenhnak ah 2017-2018 phaisa kum ah hin $ 158 billion renglo a hman ve. Hika zawn ah hin American nakin Australia nih Budget (phaisa) a hman deuh. American minung hi Australia minung aa leet 12.36nak in an tam. Billion 158 hi 12.36 in kan karh tikah cun Billion 1952 a chuak. US nih a hmanmi cu Billion 1163 a si i, hi zawn ah cun Australia nih a tei ngaingai.
(8). Rammi nun chansau nak, fim cawnnak, rumnak, ngandamnak lei ah (Health ,Education and life span)
America ram hi United Nation Human Development report ning cun ngandamnak, chansaunak, fim cawnnak lei ah hin vawleicung ah 11nak lawng a si.
Australia ram hi ngandamnak, fim cawnnak, minung chansaunak lei ah hin 2nak a si. A pakhatnak ah Norway a si.
(9). Eidin, thilri man, thilri hlan man, inn man (house, Restaurant, consumer, Rent, Grocery)
America ram ah buaktlak in inn man hi Australia nakin inn man a fawi deuh. Eidin man hi US hi Australia nakin buak tlak in 1.86% in a fawi deuh. Mei man hi Australia nakin US hi buaktlak in 0.79 % in a niam deuh. Rawl dawr ah rawlei man hi 4.22 % in US hi a fawi deuh. Thil hlan man belte ah cun US hi Australia nakin 6.44 % in a fak deuh. A zei dang paoh ah US hi Australia nakin thil man a niam deuh. An nunning Living Standard ah hin Australia a sang deuh ti a lang.
(10). Riantuantu thlahlawh (Salary)
US ram ah riantuantu thlahlawh a niam bik hi suimilam pakhat ah ram pumpi buaktlak in US$9.84 (2018, January 1 in ) a si.
Australia ram ah riantuantu thlahlawh a niam bik hi suimilam pakhat ah ram pumpi buaktlak in $18.93 (2018 July 1 in ) a si. Riantuantu thlahlawh buaktlak in kan zoh ah cun US nakin Australia a sang deuh ti a lang.
(11). Leitang thilchuak (Natural resources)
America ram cu vawleicung ah Leitang chuak a tam bik ram (2)nak a si (2016). Australia ram cu Vawleicung ah leitang chuak a tam biknak ram (8)nak a si (2016).
Hi a cunglei America ram le Australia ram epchunhnak biatlang (11) kan tial khawhmi ah hin Biatlang (6), (7), (8), (10)nak zawn ah cun USA nakin Australia a tha deuh. A dang biatlang hmun (7) tu ah cun America ram a tha deuh ti hi hmuh khawh a si.
Biakilh: Hi cabia cu catialtu pumpak hmuhning a si.
About The Author
